Saýda mınıstrligi Tramptyń jańa baj salyǵyna qatysty málimdeme jasady
ASTANA. KAZINFORM – Qazaqstan Respýblıkasy Saýda jáne ıntegratsııa mınıstrliginiń AQSh-tyń birqatar taýarǵa jańa kedendik bajdar engizýine qatysty málimdemesi jarııalandy.
– AQSh tarapynan qabyldanǵan jańa saýda sharalaryn aldyn ala taldaý nátıjesinde, Qazaqstannan AQSh-qa eksporttalatyn taýarlarynyń eleýli bóligine qosymsha tarıfterdiń áseri bolmaıtyny anyqtaldy. Óıtkeni olar AQSh ákimshiliginiń normatıvtik aktilerinde kózdelgen erekshelikter tizimine engizilgen, - dep jazylǵan habarlamada.
Qazaqstan Respýblıkasynyń Ulttyq statıstıka bıýrosynyń málimetteri boıynsha, 2024 jyldyń nátıjesi boıynsha Qazaqstan men AQSh arasyndaǵy taýar aınalymy 4,2 mlrd AQSh dollaryn qurady, bul ótken jylmen salystyrǵanda 4%-ǵa artyq (4,1 mlrd AQSh dollary). Qazaqstannyń AQSh-qa eksport kólemi 2024 jyly 30,6%-ǵa artyp, 2,0 mlrd AQSh dollaryn qurady. AQSh-tan Qazaqstanǵa ımport kólemi 2,2 mlrd AQSh dollary boldy.
– Qazaqstannyń AQSh-qa eksport qurylymynda negizgi oryn alatyn taýarlar — shıki munaı, ýran, kúmis, ferrosplavtar jáne basqa da taýarlar. Bul sanattaǵy ónimder AQSh Prezıdentiniń «Taýarlar saýdasyndaǵy mańyzdy jáne turaqty tapshylyqty joıý maqsatynda ózara tarıfter arqyly ımportty retteý týraly» Jarlyǵy boıynsha erekshelikter tizimine engizilgen taýarlardyń 92%-yn quraıdy, - delingen Saýda mınıstrliginiń málimdemesinde.
Qosymsha bajdar belgili bir taýar toptaryna qatysty engiziletin bolady. Bul sanattaǵy taýarlardyń eksport kólemi byltyr 95,2 mln AQSh dollaryn qurady. Olardyń ishinde — fosfor (2024 jyly eksport kólemi 15,9 mln AQSh dollary), ferrosılıtsıı (12,7 mln AQSh dollary), lınzalar (4,1 mln AQSh dollary), bıdaı kleıkovınasy (4 mln AQSh dollary), ammonıı nıtraty (2,4 mln AQSh dollary).
Qabyldanǵan tarıftik sharalar Qazaqstannyń AQSh-qa jalpy eksportynyń tek 4,8%-yna ǵana áser etedi. Úkimet Qazaqstanǵa qatysty qosymsha bajdardy qoldanbaý múmkindigin talqylaý úshin AQSh tarapymen konsýltatsııalar júrgizýge nıetti.
– Qazaqstan Respýblıkasy 10 jyl boıy Dúnıejúzilik saýda uıymynyń (DSU) múshesi bolyp keledi jáne syrtqy saýda saıasatyn júzege asyrýda uıymnyń prıntsıpterin qatań ustanady. AQSh-pen ekijaqty yntymaqtastyq aıasynda Qazaqstan halyqaralyq mindettemelerge sáıkes saýdada teń jáne kemsitýshilikke jol bermeıtin jaǵdaılardy qamtamasyz etedi, - delingen vedomstvada.
Eske sala keteıik, buǵan deıin Tramp memleketterge barlyq salany qamtıtyn baj salyǵyn engizýdi josparlap otyrǵanyn jazǵan edik.