Saýda mınıstrligi taýar baǵasyn turaqtandyrýǵa baǵyttalǵan baıqaýdy qaıta uıymdastyrmaq

ASTANA. KAZINFORM - QR Saýda jáne ıntegratsııa mınıstrligi 23-31 jeltoqsan aralyǵynda «Bereke Fest» respýblıkalyq aktsııasyn qaıta ótkizip jatyr.

Aktsııaǵa elimiz boıynsha shamamen 80-ge jýyq iri saýda jelisi qatysyp jatyr. Olardyń qatarynda SMALL, Magnum, Fermag, Anvar, Toimart, Fermag, Dina, Norma, Dana sekildi iri rıteılerlermen qatar, óńirlik saýda jelileri de bar.

Bul bastama elimizdiń barlyq óńirin qamtyp, eń aldymen, halyq tutynatyn negizgi taýarlardyń baǵasyn turaqtandyrýǵa, otandyq taýar óndirýshilerdi qoldaýǵa jáne qazaqstandyq ónimniń halyqqa qoljetimdiligin arttyrýǵa baǵyttalǵan. 

Osyǵan deıin atalǵan bastamany Saýda mınıstrligi qyrkúıek-qazan aılarynda da uıymdastyrǵanyn aıta ketý kerek.

Baǵanyń tómendeýi saýda jelileriniń saýda ústemesin azaıtýy men fermerler men saýda oryndary arasyndaǵy tikeleı baılanystardy jolǵa qoıý nátıjesinde múmkin boldy. Bul - deldaldardy aınalyp ótip, ónimniń tikeleı jetkizilýine jol ashty.

Aıta ketý kerek, osy bastama aıasynda saýda jelileri saýda ústemesin tómendetip, nátıjesinde tek otandyq ónimder ǵana emes, sonymen qatar ımporttyq taýarlar da jeńildikpen usynylyp jatyr.

Aktsııa assortımenti áleýmettik mańyzy bar azyq-túlik taýarlaryn qamtıdy.

Aktsııa sheńberinde iri saýda jelilerinde qazaqstandyq óndirýshilerdiń ónimderi úshin arnaıy promo-aımaqtar uıymdastyrylǵan. Aktsııanyń negizgi maqsattary - otandyq ónimderdi ilgeriletý, saýda jelileri men jergilikti jetkizýshiler arasyndaǵy turaqty kooperatsııany damytý. Sonymen qatar, aktsııa ishki suranysty yntalandyrýǵa jáne eldiń azyq-túlik qaýipsizdigin nyǵaıtýǵa yqpal etedi.

- Aktsııaǵa qatysatyn barlyq saýda oryndary biryńǵaı stılde bezendirilgen. Bul tutynýshylardyń saýda keńistiginde erkin baǵdar alýyn jeńildetip, ónimderdiń qoljetimdiligi men jergilikti óndirisine erekshe nazar aýdarýǵa múmkindik beredi, - delingen habarlamada. 

Osyǵan deıin bólip tóleý arqyly satylatyn taýardyń baǵasyn bólek kórsetý talaby elektrondy kommertsııaǵa qoldanylatyny týraly jazdyq.