Saýda mınıstrligi ónim sapasyna qoıylatyn talaptardy kúsheıtip jatyr
ASTANA. KAZINFORM - Qazaqstan ishki naryqty qorǵaýdy kúsheıtip, otandyq óndiristiń turaqty damýyna qolaıly jaǵdaı qalyptastyryp keledi. Saýda jáne ıntegratsııa mınıstrligi qazaqstandyq taýar óndirýshilerdi qoldaýǵa jáne olardyń básekege qabilettiligin arttyrýǵa baǵyttalǵan keshendi sharalardy júıeli túrde júzege asyryp jatyr.
Mınıstrliktiń baspasóz qyzmetiniń habarlaýynsha, bul jumys ekonomıkany ártaraptandyrý saıasaty jáne «Investıtsııaǵa tapsyrys» jobasy aıasynda júrgizilip jatyr. «Báıterek» ulttyq basqarýshy holdıngi» AQ, Aýyl sharýashylyǵy mınıstrligi jáne Ónerkásip jáne qurylys mınıstrligimen birlesip ónerkásiptik jobalarǵa jan-jaqty taldaý jasaý ústinde. Jobalar tizbesi olardyń basym memlekettik baǵdarlamalarǵa sáıkestigi eskerile otyryp ońtaılandyrylyp jatyr. Bul qarjy men resýrstardy neǵurlym tıimdi ári tehnologııalyq baǵyttarǵa shoǵyrlandyrýǵa múmkindik beredi.
Іshki naryqty qorǵaýdyń mańyzdy quraldarynyń biri tehnıkalyq reglamentter men standarttar bolyp tabylady. Olar ónimniń qaýipsizdigi men sapasyna qoıylatyn mindetti talaptardy belgileıdi, taýar aınalymynyń biryńǵaı tártibin aıqyndaıdy jáne adal básekelestikti qamtamasyz etedi. Sonyń nátıjesinde bıznes úshin ashyq ári túsinikti jumys sharttary qalyptasyp, ózara saýdadaǵy tehnıkalyq kedergiler qysqarady.
Qazirgi tańda Eýrazııalyq ekonomıkalyq odaqtyń 52 tehnıkalyq reglamenti qabyldanǵan, onyń 48-i kúshine engen. Sonymen qatar 19 ulttyq tehnıkalyq reglament qoldanysta. 2025 jyly kómirge jáne joǵary kerneýli jabdyqqa qatysty ulttyq tehnıkalyq reglamentter qabyldandy. Alkogol ónimderine arnalǵan tehnıkalyq reglament qoldanysqa engizildi. Bul sheshimder ónim sapasyna qoıylatyn talaptardy kúsheıtip, naryq qatysýshylarynyń jaýapkershiligin arttyrýǵa baǵyttalǵan.
2023 jyly qabyldanǵan qurylys ónimderine arnalǵan ulttyq tehnıkalyq reglament óziniń tıimdiligin kórsetti. Atalǵan qujatty engizý otandyq jáne ımporttyq óndirýshiler úshin sertıfıkattaý talaptaryn teńestirýge múmkindik berdi. Nátıjesinde qazaqstandyq kásiporyndarǵa qatysty kemsitýshilik joıylyp, ádil básekelestik ortasy qalyptasty.
Jumys jalǵasýda. «Investıtsııaǵa tapsyrys» jobasy aıasynda qoldanystaǵy birqatar tehnıkalyq reglamentterdi zamanaýı tehnologııalar men olardy qoldaný tájirıbesin eskere otyryp qaıta qaraý josparlanyp otyr. Agroónerkásip, hımııa jáne qurylys salalaryna erekshe nazar aýdarylady. Negizgi maqsat ulttyq múddelerdi tıimdi qorǵaý jáne óndiristi jańǵyrtýǵa serpin berý.
Standarttaý júıesi ónerkásiptiń barlyq derlik salasyn qamtıdy. Normatıvtik-tehnıkalyq qujattardyń biryńǵaı qory shamamen 75 myń qujatty quraıdy. Ulttyq standarttardy qoldaný deńgeıi 70 paıyzǵa jetti. Olar retteletin satyp alýlarda keńinen qoldanylyp, otandyq bıznesti qoldaýdyń tıimdi tetigine aınalyp otyr.
Osyǵan deıin saýda mınıstrliginiń áleýmettik mańyzy bar azyq-túlik baǵasyn baqylaýdy kúsheıtetini týraly jazdyq.