Saýda mınıstrligi «Altyn sapa» konkýrsyn jańa tsıfrlyq nomınatsııamen tolyqtyrmaq
ASTANA. KAZINFORM — Qazaqstan Respýblıkasynyń Saýda jáne ıntegratsııa mınıstrligi Qazaqstan Respýblıkasy Prezıdentiniń 2006 jylǵy 9 qazandaǵy №194 Jarlyǵyna «Qazaqstan Respýblıkasy Prezıdentiniń «Altyn sapa» syılyǵyn alýǵa arnalǵan konkýrs jáne «Qazaqstannyń úzdik taýary» respýblıkalyq konkýrs-kórmesi týraly» tolyqtyrýlar men ózgerister engizý týraly buıryq jobasyn ázirledi.
Joba otandyq óndirýshilerdi ulttyq deńgeıde taný júıesin jetildirýge, shyǵarylatyn ónim men kórsetiletin qyzmetterdiń sapa standarttaryn arttyrýǵa, sondaı-aq ártúrli ekonomıkalyq salalarda ınnovatsııalar men tsıfrlyq tehnologııalardy engizýdi yntalandyrýǵa baǵyttalǵan.
Konkýrs erejelerine sáıkes qatysýshylar Komıssııa aldynda sońǵy úsh jyl ishinde shyǵarylǵan ónimniń nemese kórsetilgen qyzmettiń joǵary sapasyn rastaýy tıis. Konkýrs tórt negizgi nomınatsııa boıynsha ótkiziledi: «Óndiristik maqsattaǵy úzdik kásiporyn», «Halyqqa arnalǵan taýarlar shyǵaratyn úzdik kásiporyn», «Qyzmet kórsetetin úzdik kásiporyn», «Azyq-túlik ónimderi jáne/nemese aýyl sharýashylyǵy ónimderin shyǵaratyn úzdik kásiporyn». Ár nomınatsııa boıynsha shaǵyn, orta jáne iri kásipkerlik sýbektileri sanatynda úsh syılyq tabystalady.
Budan bólek, ınnovatsııalyq qyzmetti damytý men zamanaýı tehnologııalardy engizýdi yntalandyrý maqsatynda konkýrs aıasynda arnaıy syılyqtar taǵaıyndalady — «Úzdik ındýstrııalyq joba», «Úzdik ınnovatsııalyq joba» jáne jańa nomınatsııa — «Tsıfrlyq damý salasyndaǵy úzdik joba».
«Tsıfrlyq damý salasyndaǵy úzdik joba» arnaıy syılyǵyn engizý 2025 jylǵy 8 qyrkúıektegi Qazaqstan Respýblıkasy Prezıdentiniń Joldaýynda qoıylǵan mindetterdiń ózektiligimen aıqyndalady. Jańa nomınatsııa zamanaýı tsıfrlyq sheshimderdi engizip, óndiris, bıznes jáne basqarý salalarynda aıtarlyqtaı nátıjelerge qol jetkizgen uıymdardy yntalandyrýǵa baǵyttalǵan.
— Atalǵan nomınatsııanyń engizilýi qazaqstandyq IT-tehnologııalardy damytýǵa, eldiń básekege qabilettiligin arttyrýǵa jáne ulttyq tsıfrlyq ınnovatsııalar ekojúıesin qalyptastyrýǵa eleýli úles qosqan kompanııalar men jobalardy aıqyndaýǵa múmkindik beredi, — delingen habarlamada.
Buıryq jobasy 2025 jyldyń 4 qarashasy bastap 9 qarashasyna deıin «Ashyq NQA» ınternet-portalynda ashyq talqylaýǵa ornalastyrylǵan. Qazaqstan Respýblıkasynyń Saýda jáne ıntegratsııa mınıstrligi azamattardy jáne múddeli taraptardy jobany talqylaýǵa qatysyp, normatıvtik quqyqtyq aktini jetildirý boıynsha óz usynystaryn engizýge shaqyrady.
Buǵan deıin Saýda jáne ıntegratsııa mınıstrligi ishki saýda qaǵıdalaryna ózgerister engizý týraly jobaǵa qoǵamdyq talqylaý jarııalady.