Saýda mınıstrligi AQSh-tyń qosymsha kedendik baj engizýine qatysty túsinik berdi
ASTANA. KAZINFORM — AQSh Qazaqstanda óndirilgen jekelegen taýarlarǵa 12,5% mólsherinde qosymsha kedendik baj engizedi. Bul týraly QR Saýda jáne ıntegratsııa mınıstrligi málimdedi.
Mınıstrliktiń habarlaýynsha, AQSh 2026 jylǵy 23 shildede 1974 jylǵy Saýda týraly zańnyń 301-bólimi aıasynda júrgizilgen tergeý nátıjeleri boıynsha túpkilikti sheshim qabyldaǵan.
2026 jylǵy 24 shildeden bastap kúshine enetin jańa baj AQSh Saýda ókildigi bekitken erekshe taýarlar tizbesine engizilmegen qazaqstandyq ónimderge qatysty qoldanylady.
— Buǵan deıin qoldanylyp kelgen 10% mólsherindegi ýaqytsha ımporttyq ústeme belgilengen 150 kúndik merzimniń aıaqtalýyna baılanysty óz kúshin joıdy. Osyǵan baılanysty burynǵy ústeme jańa kedendik bajǵa qosylmaıdy, — delingen habarlamada.
QR Saýda jáne ıntegratsııa mınıstrliginiń esepteýinshe, Qazaqstannyń AQSh-qa eksporttaıtyn ónimderiniń shamamen 95%-yna qosymsha kedendik baj burynǵydaı qoldanylmaıdy.
Vedomstvo qazaqstandyq eksporttaýshylardyń múddesin qorǵaý jáne ózara tıimdi sheshimderge qol jetkizý maqsatynda AQSh-pen kelissózder men ózara is-qımyldy jalǵastyryp jatqanyn málimdedi.
Eske salaıyq, buǵan deıin AQSh prezıdenti Donald Tramp Kanadadan ımporttalatyn birqatar taýarǵa qosymsha 50 paıyzdyq baj salyǵyn engizý týraly jarlyqqa qol qoıǵanyn habarlaǵanbyz.
