Saýda mınıstrligi: AQSh tarıfteri Qazaqstan eksportynyń 4,8%-yna ǵana áser etedi
ASTANA. KAZINFORM — Saýda jáne ıntegratsııa mınıstrligi AQSh-tyń qosymsha tarıfterin engizý máselesi boıynsha túsinikteme jasady.
Mınıstrliktiń málimetinshe, Qazaqstan AQSh tarapynan qosymsha tarıfter engizý máselesine baılanysty kelissózderdi jalǵastyryp jatyr. Osy úderis aıasynda bıyl maýsym aıynda QR Saýda jáne ıntegratsııa mınıstrliginiń ókilderi AQSh tarapymen ekijaqty kezdesý ótkizdi. Qazaqstan AQSh-qa ózara tıimdi saýda yntymaqtastyǵyn damytý, taýar jetkizý tizbekterin turaqty saqtaý jáne naryqqa ádil qol jetkizý sharttaryn qamtamasyz etý máselelerin qamtıtyn resmı usynys joldady. Bul usynys AQSh prezıdenti D. Tramptyń 2025 jylǵy 2 sáýirdegi Jarlyǵy men oǵan engizilgen keıingi ózgeristerdi eskere otyryp ázirlengen.
— Kelissózder barysynda taraptar saýda-ekonomıkalyq qatynastar boıynsha keńeıtilgen ekijaqty dıalog aıasynda usynylǵan bastamalardy jan-jaqty qarastyryp otyr. Qazaqstan tarapy syndarly yntymaqtastyqqa beıil ekenin rastaıdy. Qarsy tarap ta kelissózderdi jalǵastyrýǵa ashyq. Bul óz kezeginde ózara tıimdi ári eki eldiń múddelerine saı keletin sheshimderdi ázirleýge múmkindik beredi. Buǵan deıin habarlanǵandaı, engizilgen tarıf sharalary AQSh-qa Qazaqstannan jetkiziletin jalpy eksport kóleminiń nebári 4,8%-yna ǵana áser etedi, al qalǵan 95,2%-y jańa kedendik bajdan tys qalady. Qazirgi ýaqytta Qazaqstan AQSh-qa munaı, ýran, kúmis, ferroqorytpalar, tantal, tıtan, berıllıı jáne ózge de ónim túrlerin eksporttaıdy. Bul ónimderdiń basym bóligi jańa tarıftik retteýge jatpaıdy jáne shekteýsiz eksporttalyp jatyr, — dep túsindirdi vedomstvo.
Saýda jáne ıntegratsııa mınıstrliginiń baspasóz qyzmeti atap ótkendeı, jańa tarıfterdiń yqpaly sary fosfor, ferrosılıtsıı, lınzalar, bıdaı glıýteni jáne ammonıı nıtraty syndy taýarlarǵa tıedi.
Aıta keteıik, 2025 jyldyń birinshi jarty jyldyǵynda AQSh-qa sary fosfor eksporty 2,2 myń tonnany qurady (jalpy óndiris kólemi 43 myń tonna). Ferrosılıtsıı boıynsha eksport kólemi 1 482,6 tonna (jalpy óndiris 41 830,1 tonna). Ammonıı nıtraty (ammıak selıtrasy) boıynsha AQSh-qa tasymal joq, 2025 jylǵa eksport josparlanbaǵan. Bıdaı glıýteni (glıýten) boıynsha 2025 jyldyń alǵashqy alty aıynda AQSh-qa 6 500 tonna ónim jóneltildi (shamamen 8,12 mln AQSh dollary).
Osydan buryn 7 shildede AQSh prezıdenti Donald Tramp Truth Social áleýmettik jelisinde Qazaqstan Prezıdenti Qasym-Jomart Toqaevqa joldaǵan hatty jarııalap, AQSh-tyń 1 tamyzdan bastap Qazaqstannan keletin barlyq ımportqa 25 paıyzdyq kedendik baj salyǵyn engizetinin habarlady.
Búginnen bastap Tramp birqatar elge, sonyń ishinde Qazaqstanǵa da jańa kedendik baj salyǵyn engizdi.
Tizimde 70-ke jýyq memleket pen Eýropalyq Odaq atalǵan. Importtyq baj salyǵynyń kólemi 10-nan 41 paıyzǵa deıin ózgeredi. Eń joǵary tarıfterdiń keıbiri Sırııaǵa (41%), Laos pen Mıanmaǵa (40%) jáne Shveıtsarııaǵa (39%) belgilengen. Qazaqstan úshin bul kórsetkish 25 paıyz.
Premer-mınıstrdiń orynbasary — Ulttyq ekonomıka mınıstri Serik Jumanǵarın AQSh-tyń Qazaqstan eksportyna engizgen baj mólsherlemesi týraly pikir bildirdi.