Saýda mınıstri jýrnalısterden bir apta ýaqyt surady

NUR-SULTAN. QazAqparat – QR Saýda jáne ıntegratsııa mınıstri Serik Jumanǵarın qant baǵasynyń keleshekte qandaı bolatyny týraly naqty paıymyn aıtý úshin jýrnalısterden bir apta ýaqyt surady, dep habarlaıdy QazAqparat tilshisi.

Úkimet otyrysynan keıin BAQ ókilderi keshe ǵana Saýda jáne ıntegratsııa mınıstri bolyp taǵaıyndalǵan Serik Jumanǵarınnen qant basy qashan azrandaıtyny, burynǵy mınıstr Baqyt Sultanovtyń qandaı qatelikter jibergeni týraly surady.

«Meniń áriptesim Baqyt Turlyhanuly – tájirıbeli, belsendi, kásibı maman. Árıne, qıyn ýaqyt boldy. Eki úlken problema qaıdan shyqqanyn bilesizder. Birinshi – COVID, ekinshi – Ýkraına daǵdarysy bolyp jatyr. Ol, árıne baǵalarǵa da, logıstıkaǵa da áser etti. Sol sebepti, qazir bireýdi jamandap, bireýdi maqtaıtyn jaǵdaıym joq. Meniń qazirgi mindetim – erteń osyndaı jaǵdaıdyń qaıtalanbaýy», - dedi vedomstvo basshysy.

Onyń aıtýnysha, qazir kóterme saýdada qanttyń baǵasy 700-800 teńgege jetken. Al, zaýyttan shyqqan baǵa – 450 teńge.

«Dál qazir qant baǵasy arzandaıdy dep aıta almaımyn. Búgin birinshi kún jumysqa shyǵyp turmyn. Bir apta berińizder», - dedi mınıstr.

Sondaı-aq, ol qant naryǵyn retteý úshin iri-iri zaýyt salý qajet emes degen pikir aıtty.

«Qyzylsha nege óspeıdi? Qyzylsha ósirý degen ońaı sharýa emes. Oǵan sý, elektr energııasy kerek. Bizde búkil zaýyttar ońtústikte. Nege olaı? Qazir onda elektr energııasy tapshy, sý qymbat, tipti joq ta. Jaqynda sarapshylarmen sóılestim. Qyzylsha soltústikte de, batysta da ósedi. Sarapshylar úlken, iri zaýyttar tipti qajet emes shyǵar dep otyr. Osy máselelerdi talqylaımyz. Meniń bilýimshe, Aýyl sharýashylyǵy mınıstri osy qant salasyn damytý úshin keshendi jospar daıyndady. Olardyń da usynystaryn qaraımyz», - dedi Serik Jumanǵarın.

Ashyq kózderden alynǵan foto