Saýda mınıstri qant tapshy dep eldi dúrliktirmeýdi ótindi

NUR-SULTAN. QazAqparat – QR Premer-Mınıstriniń orynbasary – Qazaqstannyń saýda jáne ıntegratsııa mınıstri Baqyt Sultanov qant jekelegen dúkenderde ýaqytsha bolmaýy múmkin ekenin aıtty, dep habarlaıdy QazAqparat tilshisi.

«Sózderdi konteksten julyp alyp, eldi dúrliktirýdiń qajeti joq. Men óz blogymda «Shapaǵat» bazarynda qanttyń bolmaýy týraly naqty suraqqa jaýap bergenmin. Jeke dúkenderde, bazarlarda logıstıkanyń ózgerýine baılanysty ýaqytsha qant bolmaýy múmkin. Qant óndirisiniń, ımportynyń jáne tutynýdyń balansy boıynsha bizde esh tapshylyq joq», - dedi Baqyt Sultanov Úkimette ótken baspasóz máslıhatynda.

Sonymen birge, mınıstr qanttyń ortasha baǵasy 432 teńge deńgeıinde ekenin aıtty.

Onyń aıtýynsha, qant baǵasynyń ózgerýiniń negizgi sebebi – jetkizý logıstıkasyna baılanysty.

Sondaı-aq, keshe Saýda jáne ıntegratsııa mınıstrligi Saýda komıtetiniń tóraǵasy Erjan Qazanbaev Qazaqstanda qant tapshylyǵy joq ekenin, qant qory jetkilikti mólsherde bar ekenin habarlaǵan edi.

Foto: primeminister.kz