Saýda mınıstri tutynýshylarǵa senimdi marketpleısterdi tańdaýdy usyndy
ASTANA. KAZINFORM – Qazaqstandyq tutynýshylar taýardy onlaın satyp alý kezinde senimdi marketpleısterdi tańdaýy qajet. Bul týraly Úkimettegi brıfıng barysynda jýrnalısterdiń suraǵyna jaýap bergen QR Saýda jáne ıntegratsııa mınıstri Arman Shaqqalıev málim etti.
Mınıstrdiń aıtýynsha, satyp alýshylar eń aldymen taýardyń baǵasyna mán beredi. Alaıda naryqtaǵy baǵadan aıtarlyqtaı tómen usynystarǵa saqtyqpen qaraý qajet, sebebi mundaı jaǵdaılar alaıaqtyq táýekelin arttyrýy múmkin.
– Satyp alýshylar, árıne, taýar qunyna qaraıdy. Biraq munda mańyzdy másele bar keıde naryqtaǵy baǵadan aıtarlyqtaı tómen baǵa árdaıym suraq týyndatady. Osyndaı jaǵdaıda túrli alaıaqtyq faktileri de kezdesedi, – dedi Arman Shaqqalıev.
Mınıstr qazaqstandyqtarǵa senim týdyratyn jáne taýardyń jetkizilýine kepildik beretin marketpleısterdi tańdaýǵa keńes berdi.
– Meniń keńesim qarapaıym: ózderińizge senim uıalatatyn marketpleısterdi tańdańyzdar. Árıne, jalpy jaǵdaıdy baqylap otyrý qajet. Biz bárimiz saýatty ári aqparattandyrylǵan tutynýshymyz. Sondyqtan sizge kepildi taýar usynatyn, ózimizdiń otandyq alańdardy tańdaǵan durys. Bul jaǵdaıda tutynýshy retinde siz tutynýshylardyń quqyqtaryn qorǵaý týraly zańnamaǵa sáıkes kóbirek qorǵalasyz, – dedi mınıstr.
Buǵan deıin otandyq taýarlardy ilgeriletý úshin 50 memorandýmǵa qol qoıylǵanyn jazǵanbyz.
