Mınıstr Pinduoduo saıtynyń elimizdiń saýda salasyna yqpaly týraly pikir bildirdi

ASTANA. KAZINFORM – Saýda jáne ıntegratsııa mınıstri Arman Shaqqalıev Pinduoduo sııaqty marketpleısterdiń bazar naryǵyna áseri týraly pikir bildirdi.

«Qazir Pinduoduo-ny bilmeıtin qazaq joq shyǵar. Tipti sonyń áserinen bazarda saýda saıabyrlap qalǵanyn aıtýshylar kóp. Osy máseleni zerttep kórdińizder me? Bazarlar qaı jyldary jabyla bastaýy múmkin? Jabylatyn bolsa, jumyssyz qalatyn adamdardyń máselesin qalaı sheshesizder?» - dep surady BAQ ókili.

Mınıstr Arman Shaqqalıev saýdanyń bazardan elektrondy alańǵa oıysýyn qadaǵalap otyrǵandaryn aıtty.

«Qazir elektrondy saýda damyǵan saıyn saýdagerlerdiń kóbi bazardan ketip jatyr. Biz jyl saıynǵy tendentsııany baqylap otyrmyz. Keıingi 2-3 jylda bólshek saýdadaǵy elektrondy alys-beristiń úlesi 15 paıyzdan astam deńgeıde artyp keledi. Bizdiń bólshek saýda naryǵynda, 1,5 mln adam jumys istep júr deýge bolady. Siz aıtyp otyrǵan tendentsııa osy kúıinde jalǵassa, jyl saıyn bazarda jumys isteıtin adamdardyń besten biri elektrondy qyzmetke aýysýy kerek degen sóz. Osyndaı taldaý arqyly eseptesek, 2027 jylǵa qaraı bazardaǵy 700 myńdaı adamǵa elektrondy saýdaǵa beıimdelý kerek. Olardyń bári qarapaıym saýdagerler ǵoı. Sondyqtan biz qazirden bastap olarǵa elektrondy saýdaǵa beıimdelý kerektigin aıtyp júrmiz», - dedi mınıstr.