Saýda mınıstri qyzmet kórsetý baǵytynda qaı salalar ilgerileıtinin aıtty
ASTANA. KAZINFORM – QR Saýda jáne ıntegratsııa mınıstri Arman Shaqqalıev elimizde qyzmet kórsetý salasy jalpy ishki ónimniń negizgi bóligin alyp otyrǵanyn aıtty.
- Qazirgi kezde qyzmet kórsetý salasy álemdik ekonomıkalyq ósimniń negizgi qozǵaýshy kúshine aınaldy. Bul rette qyzmet kórsetý sektorynyń ósý qarqyny alǵash ret taýar óndirý sektorynyń kórsetkishinen asyp tústi. Qazaqstandaǵy jaǵdaıǵa keler bolsaq, qyzmet kórsetý salasy jalpy ishki ónimniń (JІÓ) shamamen 60%-yn qurady, bul shamamen 92,2 trln teńgege teń, - dedi A. Shaqqalıev Quryltaıda tilshiler suraǵyna jaýap bere otyryp.
Onyń aıtýynsha, búginde qyzmetter eksporty boıynsha shamamen 8%-ǵa ósip kele jatqan IT sektorynda ońtaıly ózgeris bar. Sonymen qatar, qazir elektrondy saýda bólshek saýdanyń jalpy kóleminiń shamamen 15%-yn qurady.
- Munyń bári Qazaqstannyń álemdik úrdisti ustanyp otyrǵanyn, ıaǵnı bul úrdistiń bizdiń ekonomıkamyzda aıqyn qalyptasqanyn kórsetedi. Qyzmet kórsetý salasy bizdiń jalpy ishki ónimde de eleýli bóligin qurady. Sondyqtan kólik, IT jáne qurylys qyzmetteri ósimniń negizgi draıveri bolatynyna senimdimin. Árıne, saýda — kóterme jáne bólshek saýda da ilgerileıdi, - dedi mınıstr.
Buǵan deıin habarlanǵandaı, búgin Quryltaıdyń jalpy otyrysynda «1994 jylǵy DSU-ny qurý týraly Marrakesh kelisimine Qazaqstannyń qosylýy týraly hattamaǵa qosymsha sanalatyn Kórsetiletin qyzmetter boıynsha Qazaqstannyń erekshe mindettemeleriniń tizbesine ózgeristerdi ratıfıkatsııalaý týraly» zań jobasy birinshi oqylymda maquldandy.
