Saýda qyzmetin retteýge baǵyttalǵan zań qabyldandy
ANA. 29 jeltoqsan. QazAqparat /Qanat Mámetqazyuly/ - Búgin QR Parlamenti Májilisiniń jalpy otyrysynda palata depýtattary «QR keıbir zańnamalyq aktilerine saýda qyzmetin retteý máseleleri boıynsha ózgerister men tolyqtyrýlar engizý týraly» zań jobasyna Parlament Senaty engizgen ózgeristerdi talqylap, qujatty qabyldady.
Atalǵan zań jobasynyń negizgi maqsaty - saýda qyzmetin retteý júıesin jetildirý, syrtqy saýda qyzmetinde elimizdiń ekonomıkalyq múddelerin qorǵaý jáne alǵa jyljytý bolyp tabylady. Sondaı-aq zań jobasymen otandyq taýarlardy qoldaý jáne olardyń syrtqy naryqtarǵa jetýin qamtamasyz etý sharalary qarastyrylady. Atap aıtqanda, zań jobasy áleýmettik mańyzy bar azyq-túlik taýarlaryna baǵany turaqtandyrý maqsatynda Úkimet tarapynan qoldanylatyn júıeli sharalardy engiziledi. Іshki saýdany retteý men damytý máseleleri boıynsha jergilikti atqarýshy organdardyń, ýákiletti organdardyń jáne Úkimettiń quzyreti anyqtalady. Sondaı-aq zań jobasy boıynsha Qazaqstannyń syrtqy saýda sheńberindegi mindettemelerin oryndaýǵa baǵyttalǵan ózgerister engiziledi. Budan bólek, zań jobasy arqyly áleýmettik máni bar azyq-túlik taýarlarynyń baǵasy qurylyp, osyndaı azyq-túlik taýarlar baǵasyn retteý tetikteri qalyptasady. Onyń ishinde sondaı taýarlarǵa saýda baǵalarynyń dálizi bekitiledi.
Atalǵan shara naryqtaǵy áleýmettik taýarlarǵa negizsiz baǵa ósimin boldyrmaıdy ári baǵany retteıdi. Máselen, eger oblystarda áleýmettik mańyzy bar azyq-túlik taýarlaryna saýda baǵalarynyń belgilengen dálizderi artyp ketse, Úkimettiń osyndaı oblystarǵa ruqsat etilgen shekti saýda baǵalarynyń mólsherin 90 kúnnen aspaıtyn merzimge belgileýge quqyǵy bolady. Al áleýmettik máni bar azyq-túlik taýarlaryna shekti ruqsat etiletin saýda baǵalarynyń mólsherin baqylaý jergilikti atqarýshy organdardyń mindeti bolyp tabylady.
Májilis maquldaǵan zań jobasyna Senat 12 túzetý engizgen bolatyn. Bulardyń basym bóligi redaktsııalyq naqtylaý sıpatynda bolyp otyr.
