Saýda kórigi qyzdy
ALMATY OBLYSY. Shildeniń 30-y. QazAqparat - Almaty qalasynyń Medeý aýdanyna qarasty «Samal» yqshamaýdanynyń turǵyndary Talǵar aýdanynan ár senbi saıyn jetkiziletin tabıǵı da taza aýylsharýashylyq ónimderin bazardan áldeqaıda tómengi baǵada satyp alý múmkindigine ıe boldy.
Buǵan deıin de azyq-túlik qamymen alysqa sabylmaıtyn «samaldyq» turǵyndar bazar ornynyń aýysýyna baılanysty bul aýylsharýashylyq ónimderinen kóz jazyp qalǵan edi. Endi, mine, ótken senbide úırenshikti orynǵa qaıta oralǵan bazardyń baǵy janyp, aýdannyń ár selolyq okrýginen jetkizilgen et-sút, kókónis ónimderine degen suranys joǵarylap, taýardyń demde ótýiniń kýási boldyq. Tańmen talasa turyp, saýda ornyn retke keltirip, taýarlaryn tizip úlgergen saýdagerlerdiń isi sátti bastaldy. Ásirese, jańa soıylǵan jylqy men sıyr etine, qazy men jal-jaıaǵa, sondaı-aq, Belbulaq aýylynyń «SoM ı D» jaýapkershiligi shekteýli seriktestiginiń jaıyn, tuqy, taban, aqmarqa, sazan syndy balyq túrleri men Kóktóbeden kelgen taý balyna suranys artyp, uzynsonar kezekke turýshylar qatary kún sáskege kóterilgende tipten kóbeıe tústi.
«Qystyń qamyn jaz oıla» degen emes pe, bul kúni arzan baǵaly qııar men qyzanaqtyń, baıaldy men kartoptyń da óz kezeginde saýdasy qyzyp, qalalyq turǵyndardyń qorjyndaryn qampaıtty.
