Saýda kelissózine úmitpen qarap otyrmyz — AQSh saýda mınıstri

ASTANA. KAZINFORM — AQSh saýda mınıstri Govard Lıýtnık 11 mamyr kúni Qytaımen júrgizilip jatqan kelissóz týraly pikir bildirip, resmı Vashıngtonnyń tıisti kezdesýge «optımıstik kózqaraspen» qarap otyrǵanyn aıtty. 

Lianhe Zaobao basylymynyń habarlaýynsha, Lıýtnık CNN-ge bergen suhbatynda apta sońynda Shveıtsarııada ótken kelissózdi qos taraptyń da «qoldap» otyrǵanyn aıta kelip, «biz bul protsestiń sátti ótetine senimdimiz» dep málimdegen. Ol jumys toptarynyń qos tarap úshin de «óte mańyzdy» kelissózder júrgizip jatqanyn atap ótti.

Sıngapýrlyq basylym Shveıtsarııa BAQ-taryna silteme jasap, jeksenbi kúngi kelissózdiń jergilikti ýaqytpen saǵat 10:00–de bastalyp, jabyq esik jaǵdaıynda ótkenin habarlady. Bul kezdesýge Qytaı vıtse-premeri He Lıfen, AQSh Qarjy mınıstri Skott Bessent jáne Saýda ókili Djeımıson Grır qatysty.

Reuters agenttiginiń habarlaýynsha, AQSh Qarjy mınıstri Skott Bessent jeksenbi kúni Qytaımen ekijaqty saýdanyń passıv teńgerimin azaıtý máselesi boıynsha kelisimge kelgenin málimdegen. Ol Jenevada ótken eki kúndik kelissózdiń qorytyndysyna sáıkes Qytaı tarapymen «eleýli ilgerileýshilikke» qol jetkizilgenin atap ótti, alaıda kelisimniń naqty mazmuny jaıly ashyp aıtqan joq.

Lianhe Zaobao-nyń jazýynsha, Aq úıdiń Ulttyq ekonomıkalyq keńesiniń dırektory Kevın Hassett Beıjińniń Vashıngtonmen saýda qatynasyn qalpyna keltirýge múddeli bolyp otyrǵanyn aıtqan.

— Qytaılyqtar (bizben) yntymaqtastyqqa óte yntaly bolyp otyrǵan kórinedi, olar eki el arasyndaǵy saýda qatynastaryn qalpyna keltirýge tyrysyp jatyr, — dep málimdedi Hassett jeksenbi kúni Fox News telearnasyna bergen suqbatynda.

AQSh-Qytaı saýda kelissózi aıasyndaǵy alǵashqy kezdesý 10 mamyr kúni Jenevada ótti.