Saýda qaqtyǵysy: Brazılııa AQSh taýarlaryna qarsy shara qoldanýǵa daıyn

ASTANA. KAZINFORM — Brazılııa 1 tamyzdan bastap AQSh-tan keletin taýarlarǵa baj salyǵyn engizedi. Bul týraly Ońtústik Amerıka eliniń prezıdenti Lýıs Inasıý Lýla da Sılva málimdedi, dep jazady TASS. 

Onyń aıtýynsha, eger atalǵan kúnge deıin AQSh bıligi Brazılııa ónimderine jarııalaǵan 50 paıyzdyq baj salyǵyn joımasa, el «ózara jaýap berý» qaǵıdatyna kóshedi.

— Eger [AQSh tarapynan baj salyǵyn joıý týraly] sheshim qabyldanbasa, biz 1 tamyzdan bastap ózara sharalar qaǵıdatyn qoldanamyz, — dedi memleket basshysy Jornal Nacional basylymyna bergen suhbatynda.

Lýla da Sılva AQSh-tyń mundaı tarıftik saıasaty BRICS elderin ózara saýdada AQSh dollarynan tezirek bas tartýǵa ıtermeleýi múmkin ekenin atap ótti.

Sondaı-aq prezıdent buǵan deıin AQSh prezıdenti Donald Tramptan kelgen hattyń mazmunyn «qabyldaýǵa kelmeıdi» dep baǵalady. Hatta Tramp Brazılııa basshylyǵyn burynǵy prezıdent Jaır Bolsonarýǵa qatysty sot protsesine baılanysty synǵa alǵan.

— Bul — bir eldiń ekinshi bir egemen memlekettiń ishki isine aralasýy. Mundaı áreket — eshqandaı jaǵdaıda qabyldanbaıdy, — dedi Lýla da Sılva.

Eske sala ketsek, Donald Tramp 1 tamyzdan bastap Brazılııadan ákelinetin taýarlarǵa 50 paıyz kóleminde baj salyǵyn engizetinin málimdegen. Aq úı basshysynyń aıtýynsha, bul sheshim AQSh pen Brazılııa arasyndaǵy saýda teńgeriminiń buzylýyna baılanysty qabyldanǵan.

Brazılııa prezıdenti bul málimdemelerdi «absýrd» dep baǵalady. Ol sondaı-aq AQSh tarapynan engizilgen tarıfterge el bıligi 11 sáýirde qabyldanǵan ózara ekonomıkalyq sharalar týraly zań aıasynda jaýap beretinin aıtty. Bul zań saýda jeńildikterin, ınvestıtsııalardy jáne zııatkerlik menshik quqyqtaryna qatysty mindettemelerdi toqtatý krıterıılerin qamtıdy.