«Sauda in Digital Nauryz» baıqaýynyń jeńimpazdary anyqtaldy

ASTANA. KAZINFORM – Saýda jáne ıntegratsııa mınıstrligi saýda sýbektileri arasynda ótken «Sauda in Digital Nauryz» respýblıkalyq baıqaýynyń qorytyndysyn shyǵardy.

13-20 naýryz aralyǵynda ótken bul is-shara saýda salasyndaǵy tsıfrlandyrý men jasandy ıntellektiniń (JI) áleýetin pash etti.

Qatysýshylar bes negizgi krıterıı (JI qoldaný, kreatıvtilik, ulttyq naqysh, aýdıtorııa belsendiligi jáne sapa) boıynsha 100 upaılyq júıemen baǵalandy.

Baıqaý nátıjesi boıynsha kelesi saýda nysandary úzdik dep tanyldy:

«Úzdik tsıfrlyq quttyqtaý» – TsÝM (Qaraǵandy q.): Eń joǵary 92 upaı. Vıdeomaterıal Naýryz meıramynyń qundylyqtaryn tsıfrlyq arnalar arqyly tıimdi translıatsııalap, aýdıtorııany emotsıonaldy tarta bilgeni úshin marapattaldy.

«Jasandy ıntellektini úzdik qoldaný» – «Ýmaı» (Qaraǵandy q.): 90 upaı. Jobada JI tehnologııalary vızýaldy jáne ınteraktıvti kontent jasaý úshin qoldanylyp, zamanaýı tsıfrlyq quraldardyń joǵary áleýetin kórsetti.

«Eń kreatıvti Digital-joba» – «Small» jelisi: 90 upaı. Standartty formattan tys, storıtellıng elementteri men aýdıtorııany tartýdyń biregeı kontseptsııasyn usynǵany úshin úzdik atandy.

«Úzdik tsıfrlyq bezendirý» – «Anvar»: 88 upaı. Saýda keńistigin ekrandyq sheshimder men vızýaldy elementter arqyly keshendi túrde bezendirip, kelýshiler úshin birtutas merekelik atmosfera qalyptastyrdy.

Mınıstrlik ókilderi atap ótkendeı, bıylǵy qatysýshylar Instagram jelisinde #saudadigitalnauryz heshtegimen belsendilik tanytyp, saýda salasynyń zaman talabyna saı ózgerip jatqanyn dáleldedi.

Jeńimpazdardy marapattaý rásimi 23 naýryz kúni saltanatty túrde ótti.

Buǵan deıin Ulystyń uly kúni – Naýryz merekesine oraı 2026 jylǵy 13–20 naýryz aralyǵynda saýda salasyn tsıfrlandyrý men jasandy ıntellektini qoldanýǵa arnalǵan «Sauda in Digital Nauryz» baıqaýy ótetinin jazǵan edik.