Saýda draıverine aınalǵan Astanada bazar ınfraqurylymy jańartýdy qajet etedi
ASTANA. KAZINFORM – Búgin qalalyq máslıhatta «Jergilikti atqarýshy organdardyń áleýmettik mańyzy bar azyq-túlik taýarlaryna baǵany turaqtandyrý jónindegi jumysynyń jaı-kúıi: problemalary, sebepteri jáne sheshý joldary týraly otyrys ótti.
Tyńdaýda Astana qalasynyń Investıtsııalar jáne kásipkerlikti damytý basqarmasynyń basshysy Halel Ákimjanov baıandama jasap, elordadaǵy saýda salasynyń qazirgi ahýaly men damý perspektıvalaryna toqtaldy.
Onyń aıtýynsha, saýda sektory qala ekonomıkasynyń negizgi draıverleriniń biri sanalady. Bul sala jalpy óńirlik ónimniń 22 paıyzyn qurap otyr. Sońǵy jyldary jyldyq ósim orta eseppen 10 paıyz. 2025 jyldyń qańtar-shilde aılarynda saýda kólemi 5,5 trln teńgeni qurap, ótken jyldyń sáıkes kezeńimen salystyrǵanda 9,2 paıyzǵa ósken.
— Saýdadaǵy ósimge áser etip otyrǵan negizgi faktorlardyń biri — elektrondyq kommertsııa. 2024 jyldyń qorytyndysy boıynsha Astanada onlaın saýda kólemi 196 mlrd teńgeni qurady. Bul kórsetkish boıynsha elorda Almatydan keıingi ekinshi orynda, — dedi Halel Ákimjanov.
Basqarma basshysynyń aıtýynsha, syrtqy saýda aınalymy da oń ósim kórsetip otyr. 2025 jyldyń qorytyndysy boıynsha bul kórsetkish 7,2 mlrd AQSh dollaryn quramaq. Onyń ishinde 4,4 mlrd dollar — eksport, al 2,8 mlrd dollar — ımportqa tıesili. Bul ótken jylmen salystyrǵanda 7 paıyzǵa joǵary.
Sondaı-aq qalada azyq-túlik qaýipsizdigin qamtamasyz etýde bazarlardyń jaǵdaıy mańyzdy ról atqarady. Qazirgi tańda elordada 25 bazar jumys isteıdi. Alaıda olardyń bir bóligi zańnama talaptaryna sáıkes jańǵyrtýdy qajet etedi.
— Shanhaı, Saryarqa, Alash, Sharyn, Uljan, Altaı jáne Ortalyq bazarlar — jańartý baǵdarlamasyna engizilgen. Sonymen qatar ınvestıtsııa kólemi 11 mlrd teńgeni quraıtyn Etalon qurylys naryǵyn qaıta jańǵyrtý josparlanǵan. Saraptamalar júrgizilip, tıisti kelisimder alynǵanymen, jer jáne sanıtarlyq normalardyń buzylýy, ınfraqurylym men qarjylandyrý tapshylyǵy sekildi máseleler bar, — dedi basqarma basshysy.
Ákimjanovtyń málimetinshe, Alash jáne Sharyn bazarlarynda jerdi ruqsatsyz paıdalaný, jolaýshylar avtobýstarynyń ruqsatsyz ornalastyrylýy sııaqty zań buzýshylyqtar anyqtalǵan. Sonymen qatar bazarlarda jumys isteıtin kásipkerler mindetti saqtandyrýmen tolyq qamtylmaǵan.
— Mindetti saqtandyrýǵa qatysty másele Bıg Shanhaı bazarynda sońǵy eki aıda týyndady. Qazirgi ýaqytta bul máseleni sheshý boıynsha jumystar júrgizilip jatyr. Bazarda kásipkerler óz qyzmetin jalǵastyrýda. Banktermen birlesip birqatar sharalar qabyldanyp, kásipkerlerdiń nesıeleri 6 aı merzimge shegerildi, — dep túıindedi baıandamasyn Halel Ákimjanov.
Buǵan deıin, Azyq-túlik tapshylyǵy táýekelin anyqtaýdyń ádisi engiziletinin jazǵanbyz.