Saýda departamenti qaraǵandylyqtarǵa 10 aıda 84 mln teńgesin keri qaıtardy
QARAǴANDY. KAZINFORM — Jyl basynan Qaraǵandy oblysy boıynsha saýda jáne tutynýshylardyń quqyǵyn qorǵaý departamentine tutynýshy quqyǵynyń buzylý faktisi boıynsha 2528 ótinish túsken. Bul týraly Qaraǵandy oblsynyń óńirlik kommýnıkatsııalar qyzmetinde ótken otyrysta aıtyldy.
Mamandardyń aıtýynsha, óńirdegi tutynýshylardyń shaǵymdary turmystyq qyzmetter, ıaǵnı kosmetıkalyq, jıhaz daıyndaý, avtokólik jóndeý, turmystyq tehnıkany jóndeý qyzmetterine jáne turǵyn úı-kommýnaldyq qyzmetterge qatysty túsken.
— Tutynýshylardyń quqyǵyn qorǵaý boıynsha 2025 jyldyń basynan beri aýmaqtyq departament 36 jospardan tys tekserý júrgizdi. Nátıjesinde tutynýshylardyń quqyǵyn buzǵan kásipkerlerge 16 ákimshilik aıyppul, 10 eskertý berildi. Jalpy jyl basynan tutynýshylardyń paıdasyna qaıtarylǵan qarajat kólemi 84 241 047 teńgeni qurady, — dedi Qaraǵandy oblysy borıynsha saýda jáne tutynýshylardyń quqyǵyn qorǵaý departamentiniń basshy Abzal Rahymbaev.
Sonymen qatar 2025 jyldyń 10 aıynda Departament tutynýshylar quqyǵyn qorǵaý boıynsha 24 sot protsesine úshinshi tarap retinde qatysty. Bıyl qarashada departament qala turǵyndarynyń podezdi jınaý qyzmetiniń sapasyna jáne qyzmet kórsetýshi jeke kásipkerdiń áreketterine qatysty ujymdyq shaǵymyn qarady.
Tekserý barysynda departament mamandary tutynýshylarǵa qyzmettiń naqty oryndaýshysy týraly durys aqparat berilmegeni, shartty buzý tártibiniń saqtalmaǵany anyqtaldy. 10-nan astam azamattyń quqyǵy bir másele boıynsha buzylǵandyqtan, Departament «Tutynýshylardyń quqyqtaryn qorǵaý týraly» Zańnyń 5-baby 8-tarmaǵyna sáıkes sotqa deıingi talap joldady.
4 qarashada qyzmet kórsetýshige shartty buzý, qyzmetten bas tartqan turǵyndar úshin esepteýlerdi toqtatý, qyzmet kórsetýshi týraly naqty aqparat berý talaptary jiberildi. 6 qarashadaǵy resmı jaýapqa sáıkes, shart buzyldy, ıaǵnı 1 jeltoqsannan bastap barlyq esepteýler toqtatyldy. Osylaısha departament turǵyndardyń quqyqyǵyn sotqa deıin tolyq qalpyna keltirildi.