Saýda balansynyń teris saldosyn ózgertý kerek - Úkimet basshysy
NUR-SULTAN. QazAqparat - QR Premer-Mınıstri Asqar Mamın saýda balansynyń teris saldosyn ózgertýdi tapsyrdy, dep xabarlaıdy QazAqparat tilshisi.
«Eýrazııalyq odaq boıynsha negizgi saýda seriktesterimen, sondaı-aq, Qytaı jáne basqa da eldermen saýda balansynyń teris saldosyn ózgertý qajet. Osy rette otandyq taýarlar men qyzmetterdiń básekege qabiletteligin arttyrý kerek. Bul jumysty uıymdastyrý úshin Qazaqstandyq ıdýstrııa jáne eksport ortalyǵy quryldy. Eksporttyq áleýetti damytý maqsatynda memleket tarapynan qoldaý sharalary uıymdastyryldy», - dedi A.Mamın.
Úkimet basshysynyń aıtýynsha, transshekaralyq ınfraqurylymnyń sapasy men qoljetimdiligin arttyrý jumystaryn da kúsheıtý kerek. Osy oraıda kórshi elderdiń ekonomıkalyq ósimin de eskergen jón.
«Mysaly, Qytaı - 6,3 protsent, Ózbekstan men Tájikstan - 5 protsent, Qyrǵyzstan - 3,8 protsent, Ázerbaıjan - 3,4 protsent, al Reseıde 1,6 protsenttik ósim bolady degen boljam bar. Bunyń bári óńirdegi saýdany odan ári arttyrýǵa jáne otandyq taýarlardyń osy memleketterdiń naryqtaryna shyǵarýǵa jaǵdaı jasaıdy», - dep atap kórsetti A.Mamın.
Aıta keteıik, Úkimettiń búgingi otyrysynda QR Premer-Mınıstri Asqar Mamın negizgi kapıtalǵa salynatyn ınvestıtsııalar boıynsha jumysty kúsheıtýdi tapsyrdy.
Aldaǵy ýaqytta Úkimet sheteldik ınvestıtsııalardy tartýdyń jańa tásilderin talqylaıdy.
Al «Samuryq-Qazyna» qorynyń basshysy Axmetjan Esimov shetelde qordyń aktıvterine toqtam salý máselesin kóterdi.
