Saýd Arabstany qajylyq kezinde tumaý indetiniń aldyn alý úshin qatań sharalar engizdi
ASTANA. Qarashanyń 24-i. QazAqparat - Saýd Arabstany qajylyq kezinde A/H1N1/ jańa tumaýynyń aldyn alý úshin qatań sharalar qabyldaýda,
dep habarlaıdy ITAR-TASS agenttigi. Bul týraly dúısenbi kúni Koroldiktiń ókimeti qarashanyń 25-inde resmı bastalatyn Mekke men Mádınege qajylyqtyń qarsańynda málim etti.
Atap aıtqanda, árbir minájat etýshi elge kelgen soń dene qyzýyn anyqtaıtyn apparat arqyly tekserýden ótýi kerek. Dene qyzýy Tselsıı baǵamy boıynsha 38 gradýstan joǵary bolǵandar qajylyqqa jiberilmeıdi. Saýdııanyń barlyq aılaqtary, birinshi kezekte, qajylyqqa kelýshilerdiń eń úlken termınaly ornalasqan Jidda áýejaıy osyndaı qyzý anyqtaıtyn apparattarmen jaraqtalyp otyr.
Oǵan qosa, Saýdııa barlyq musylmandar úshin kvotany shektep otyr. Jáne qarııalarǵa, sozylmaly naýqastary bar adamdarǵa, aıaǵy aýyr áıelder men balalarǵa bıylǵy qajylyqqa qatyspaýǵa keńes berilýde. Elge kelýshilerdiń barlyǵynyń qolynda tumaýǵa qarsy egilgenderi týraly anyqtama qaǵazdary bolýy kerek.
