Saýd Arabııasynyń sheneýnikteri áıel robotqa el azamattyǵyn berdi
ASTANA. QazAqparat - Saýd Arabııasy robotqa azamattyq bergen álemdegi eń alǵashqy el. Mundaı erekshe qadam atalmysh memlekettiń jasandy ıntellekt pen joǵary tehnologııalardyń ortalyǵy ekenin kórsetedi, dep jazdy USA.one.
«Gonkongtiń «Hanson Robotics» kompanııasynyń ınjenerleri qurastyrǵan Sofııa esimdi robot Future Investment Initiative jobasynyń otyrysynda júzdegen delegattar aldynda resmı túrde Saýd Arabııasynyń azamattyǵyn aldy», dep jazdy saıt úkimettiń baspasóz habarlamasyna silteme jasap. Robot ózine kórsetilgen qurmet úshin sheneýnikterge sypaıy túrde alǵys bildirdi.
Osydan keıin robotpen birge baspasóz máslıhaty ótip, Sofııaǵa túrli suraqtar qoıyldy. Oǵan nelikten qýanyshty bolyp turǵanyna qatysty qoıylǵan suraqqa «aınalasyn aqyldy, onyń ústine dáýletti ári yqpaldy adamdar qorshap turǵanda, ol únemi qýanyshta bolatynyn» aıtty.
Sofııa sondaı-aq, Blade Runner jáne Terminator syndy Gollıvýdtyń shytyrman fılmderinde kórsetilip jatqandaı, jasandy ıntellekttiń kóterilisine alańdaýdyń qajeti joqtyǵyn atap ótti.
Bul jańalyq áleýmettik jelilerde qyzý talqylana bastady. Keıbir qoldanýshylar sheneýnikterdiń robotqa azamattyq quqyǵyn berýine ashý-yzalaryn bildirse, Tvıtter qoldanýshylarynyń biri Sofııanyń qasynda nege er jynysty serigi joqtyǵyna qyzyǵýshylyq tanytty.
