Saýd Arabııasynyń nysandaryna shabýyl jasalǵannan keıin munaı baǵasy sharyqtap ketti
Shabýyldar munaı qondyrǵylaryna zaqym keltirip, ony óndirý toqtatyldy. Munda álemdik jetkizilimderdiń 5% astam bóligin quraıtyn munaı óndiriledi.
Brent markaly munaıdyń baǵasy 10% artyp, barreline 66,28 dollardy qurady. Al West Texas Intermediate markaly munaıdyń baǵasy 8,9% ósip, Azııa bırjasynda 59,75 dollar boldy.
AQSh Prezıdenti Donald Tramp AQSh-tyń munaı qoryn paıdalanýǵa ruqsat bergennen keıin baǵa birshama arzandady.
Saýd Arabııasynyń munaı shyǵarý ónerkásibiniń dál ortasyndaǵy ken ornyna jáne munaı óńdeý zaýytyna jasalǵan shabýyl - álemdegi eń iri munaı óńdeý zaýytyna tıgizgen iri soqqy boldy.
BBC málimetinshe, zaqymdanǵan nysandardyń jumysyn tolyqtaı qalpyna keltirýge birneshe apta kerek. Memlekettik Saudi Aramco munaı alpaýyty shabýyldar óndiristi kúnine 5,7 mln barrelge qysqartqanyn málim etti.
AQSh memlekettik hatshysy Maık Pompeo ótken senbide bolǵan joıqyn shabýyldy Tegeran uıymdastyrnýy yqtımal dedi. Alaıda eshqandaı dálel keltirmedi. Sondaı-aq, ol ıemendik kóterilisshiler jaǵdaıǵa kináli degen qaýesetti joqqa shyǵaryp, shabýyldardyń Iemennen bjasalǵany jóninde dáleldiń joqtyǵyn atap ótti.
Iran AQSh-ty «jalǵan málimeti úshin» aıyptady.
Saýd Arabııasy Koroldigi álemdegi iri munaı eksporttaýshy. Ol kúnine jeti mıllıonnan astam barrel munaı jetkizedi. Resmı málimetterge sáıkes, Saýd Arabııasynyń bıylǵy maýsym aıyndaǵy munaı qory 188 mln barreldi quraǵan.
«Abkaık pen Hýraıstaǵy munaı nysandaryna keltirilgen zalal kólemi úlken, sondyqtan munaı jetkizilimin qaıta qalpyna keltirý úshin birneshe apta ketýi múmkin», - dedi Londondaǵy Interfax Energy analıtıkalyq bóliminiń basshysy Abhıshek Kýmar.
Saýd Arabııasy osy aptada esportty qalypty rejimde ustaý úshin munaı qoryn jumsaıdy dep kútilýde.
