Saýd Arabııasynyń koroli Mekkedegi qaıǵyly oqıǵanyń sebepterin jarııalaýǵa ýáde berdi
ASTANA. QazAqparat - Saýd Arabııasynyń korli Salman ıbn Ábdýlázız ál-Saýd Mekkede taıaýda júzden astam adam qaza tapqan ál-Ahram meshitinde oryn alǵan oqıǵany tergeý qorytyndylaryn kópshilik aldynda jarııalaýdy ýáde etti.
«Biz oqıǵanyń sebepterin anyqtap, sodan keıin azamattarǵa tergeý qorytyndylary týraly aıtamyz», - dep ýáde etti monarh. Onyń aıtýynsha, oqıǵany tergeý amaldary bastalyp ketti.
Saýd monarhy meshittiń ózinde bolyp, odan keıin qaıǵyly oqıǵa saldarynan zardap shegip, aýrýhanada jatqan adamdarǵa bardy.
Saýd Arabııasy azamattyq qorǵanys departamentiniń basshysy, leıtenant Súleıman bın-Abdolla ál-Ámr krannyń qulaýyna daýyldy jel men nóser jańbyr sebep bolǵanyn málimdedi.
Juma kúni Mekkedegi ál-Ahram meshitiniń ústine qurylys krany qulady. Oqıǵa kezinde meshit ishinde júzdegen musylman bolǵan. Sonyń saldarynan, sońǵy málimetter boıynsha, 107 adam qaza taýyp, 200-den astamy jaraqat aldy.
