Saýd Arabııasynyń Koroli Abdalla dúnıeden ótti
ASTANA. QazAqparat - Saýd Arabııasynyń Koroli Abdýllah ben Abdel Ázız Ál Saýd 23 qańtarda, juma kúni, 91 jasqa qaraǵan shaǵynda dúnıeden ótti, dep habarlady RIA Novostı Saýd Arabııasynyń memlekettik televıdenıesine silteme jasap.
Ótken aıda monarh qabyný syrqatyna ushyrap, aýrýhanaǵa jatqyzylǵan bolatyn. Ol Er-Rııadtyń klınıkalarynyń birinde medıtsınalyq tekserýden ótti. Qańtar aıynyń basynda oǵan «ókpe ınfektsııasy» dıagnozy qoıylyp, aýrýhanadan shyqty, onyń tynys alýyn jeńildetý úshin arnaıy tútik ornatyldy. Sońǵy tórt jylda ol omyrtqasyna birneshe hırýrgııalyq operatsııadan ótti.
Ol álemdegi is basyndaǵy eń qart monarh boldy. Alǵashqy Saýd koroli Abdýl-Ázız ІІ-niń otbasynda dúnıege keldi. Mekke qalasynyń meri, ulttyq gvardııanyń qolbasshysy, premer-mınıstrdiń birinshi orynbasary boldy. 1982 jyldan beri murager hanzada, al 2005 jyly óziniń qaıtys bolǵan aǵasy Fahdtyń taǵyna otyrdy.
Abdalla óziniń demokratııalyq zańdarymen tanymal. Mysalǵa, ol óziniń alǵashqy jarlyqtarynyń birinde korol otbasyna (7 myńǵa jýyq adam) memleket qazynasyn paıdalanýǵa tyıym saldy. Ol sondaı-aq monarhtyń qolyn súıýdi alyp tastady, jaı ǵana qol alysý jetkilikti dep sanady.
Taqqa otyrǵan Salman ıbn Abdýl Ázız ál-Saýd 2012 jyly 18 maýsymda Abdallanyń qaıtys bolǵan eki taq muragerin aýystyryp, murager hanzada boldy. Onyń sońǵy qyzmeti - Saýd Arabııasynyń qorǵanys mınıstri. Onyń uly Sultan - áskerı ushqysh, alǵashqy arab astronavty.
