Saýd Arabııasynyń kompanııalary Almatydaǵy bızneske ınvestıtsııa salýǵa nıet bildirdi
ALMATY. QazAqparat - Almaty ákimi Baýyrjan Baıbek halyqaralyq yntymaqtastyq aıasynda «Al Muhaidib Group» holdınginiń prezıdenti Sýleıman Ál-Mýhaıdıb bastaǵan Saýd Arabııasynyń bıznes- delegatsııasyn qabyldady, dep habarlady qalalyq ákimdiktiń baspasóz qyzmeti.
Sheteldik bıznes qaýymdastyq ókilderi Almatyda tamaq ónerkásibin, logıstıka, qurylys jáne energetıka salasyn damytýǵa óz úlesterin qosýǵa yntaly ekendikterin bildirdi.
Búgini kúni qalada birikken 6 jáne Saýd Arabııasy kapıtalymen jumys isteıtin 19 kásiporyn tirkelgen.
«Almatyda ınvestorlar úshin barlyq jaǵdaı jasalǵany qýantady. Almaty - Uly Jibek jolynyń «jumaǵy», iri múmkindikterge jol ashatyn qaqpa», - dedi Sýleıman Ál-Mýhaıdıb.
Holdıng prezıdenti Almatynyń úlken áleýetin, ortaazııalyq óńirdegi iri qarjy ortalyǵy, mádenı jáne ınnovatsııalyq hab pen Ýnıversıada-2017-niń astanasy ekendigin de aıtty.
Qala basshysy Almatyda ınnovatsııa men jańa tehnologııanyń turaqty damyp kele jatqandyǵyn jetkizdi. Baýyrjan Baıbek qonaqtardyń nazaryn túrli jobalarǵa qatysýǵa aýdardy.
«Qalada «Innovatsııalyq tehnologııalar parki» arnaıy ekonomıkalyq aımaǵy men ındýstrıaldy aımaq bar, biz bulardaǵy ınfraqurylymdar qurylystaryn aıaqtap qaldyq. Sizderdi sol jerlerde óz óndiristerińizdi ashýǵa shaqyramyz. Budan ózge qalada «Investorlarǵa qyzmet kórsetý ortalyǵy» jumys isteıdi. Biz ózara yntymaqtastyqty damytatynymyzǵa senimdimin», - dedi ákim.
Kezdesý sońynda qala basshysy delegatsııany Almatynyń 1000 jyldyǵyn merekeleýge shaqyrdy.
