Saýd Arabııasynyń energetıka mınıstri munaı baǵasynyń qymbattaıtynyn málim etti
ASTANA. QazAqparat - Saýd Arabııasynyń energetıka mınıstri Álı ál-Naımıdiń dúısenbi kúngi málimdemesinde munaı baǵasynyń kóteriletini, álemdik ekonomıkanyń ósýi «qara altynǵa» degen suranystyń artýyna sebepshi bolyp otyrǵany aıtyldy.
Tańerteńgi jaǵdaı boıynsha aqpan aıyndaǵy fıýchersterde Brent etalondyq markaly munaı baǵasy 1,14 paıyzǵa ósip, bir barreli úshin 62,52 dollarǵa jetti. Al WTI markaly jeńil munaıdyń qańtardaǵy fıýchersterde baǵasy 0,90 paıyzǵa, barreli 58,03 dollarǵa deıin ósti, dep habarlady Rosbalt.
Ábý-Dabıde ótken jeksenbi kúni bolǵan konferentsııada Álı ál-Naımı munaıdyń shamadan tys kóp bolýy «qara altynnyń» óndirýshileri arasynda OPEK aýmaǵynan tys yntymaqtastyqtyń bolmaýyna baılanysty ekenin jetkizdi. Sonymen birge onyń aıtýynsha, álemdik ekonomıkalyq ósim munaıǵa degen suranysty arttyryp otyr.
Sharada sóz sóılegen Katardyń energetıka mınıstri Muhammed ál-Sada áriptesimen kelisip, búgingi tańda «qara altyn» óndirýde onyń artylýy táýligine 2 mln barrel quraıtynyn atap ótti. Ol sondaı-aq munaı baǵasynyń ózdiginen turaqtanatynyna senim bildirdi.
