Saýd Arabııasynyń 30-dan astam kompanııasy Qazaqstanǵa ınvestıtsııa salady
Qazaqstan-Saýd Arabııasy saýda-ekonomıkalyq, ǵylymı-tehnıkalyq jáne mádenı yntymaqtastyq jónindegi Úkimetaralyq komıssııasynyń 5-shi otyrysyna qatysý úshin elordaǵa ınvestıtsııalar mınıstri Halıd A. ál-Falıh bastaǵan Saýd Arabııasy Koroldiginiń delegatsııasy keldi.
Sharaǵa eki eldiń isker toptary men bıznesiniń 170-ten astam ókili keldi.
QR Syrtqy ister Mınıstriniń orynbasary Almas Aıdarov Saýdııa naryǵynyń Qazaqstanmen iskerlik baılanystar men saýda-ekonomıkalyq qatynastardy nyǵaıtýdaǵy zor mańyzyn, «Saudi Vision 2030» ulttyq baǵdarlamasyn iske asyrý aıasynda Qazaqstan men Saýd Arabııasynyń ınvestıtsııalyq yntymaqtastyǵyn keńeıtýdiń eleýli áleýetin atap ótti.
«Saýd Arabııasy kásipkerlikti damytý, ekonomıkany ártaraptandyrý jáne áleýmettik reformalardy júzege asyrý boıynsha álemniń kóptegen elderi úshin tabysty modelge aınaldy. Biz «Saudi Vision 2030» strategııalyq baǵdarlamasyn júzege asyrýdyń tabysy men tıimdi nátıjelerin kóretinimizge qýanyshtymyz. Aýyl sharýashylyǵy, munaı hımııasy, TKMK, JEK, qarjy jáne basqa da ekonomıka salalarynda yntymaqtastyǵymyzdy odan ári damytý úshin úlken áleýetimiz bar dep sanaımyn», - dedi Almas Aıdarov.
Sondaı-aq, Saýd Arabııasynyń 30-dan astam kompanııasy Qazaqstanǵa ınvestıtsııa salý múmkindigin qarastyratyny habarlandy. Forým sheńberinde qazaqstandyq taraptan «KAZAKH INVEST», «KIDF», «AHQO», «QazTrade» jáne «Kazakh Tourism» basshylary jáne Saýd Arabııasy ınvestıtsııalar mınıstrligi men «NCPP» basshysy spıker retinde sóz sóıledi.
Óz sózinde «KAZAKH INVEST UK» AQ Basqarma tóraǵasy Meıirjan ıÝsýpov saýdııalyq seriktesterge Qazaqstannyń ınvestıtsııalyq áleýetin tanystyrdy, forým qatysýshylaryn ınvestıtsııa tartýdyń memlekettik júıesinde qoldanylatyn jańa tásildemelermen tanystyrdy, sondaı-aq eki eldiń qarym-qatynasyn tereńdetýdiń mańyzyn atap ótti.
«Búgingi tańda Saýd Arabııasynan Qazaqstanǵa keletin ınvestıtsııanyń jalpy kólemi 100 mıllıon AQSh dollarynan asady. Alaıda, bul kórsetkish bizdiń elderimizdiń áleýetin tolyq kórsete almaıdy. Osy maqsatta KAZAKH INVEST Qazaqstan men SAK bıznesiniń ınvestıtsııalyq yntymaqtastyǵyn nyǵaıtý boıynsha jan-jaqty jumys júrgizýde. Mysaly, QR Saýd Arabııasyndaǵy elshiligimen birlesip, Djıdda saýda-ónerkásip palatalary men Ál-Kassım provıntsııasynyń qoldaýymen jáne NCPP-men birlesip, saýda, ekonomıka jáne ınvestıtsııalar salasyndaǵy Qazaqstan-Saýd Arabııasy yntymaqtastyǵyna arnalǵan birqatar shara ótkizildi. Bul bizge bıznes úshin barynsha qyzyǵýshylyq týdyratyn baǵyttar boıynsha birlesken is-qımyldardy odan ári úılestirý úshin iskerlik baılanystar ornatýǵa múmkindik berdi», - dep atap ótti Meıirjan ıÝsýpov.
Sonymen birge forýmda KAZAKH INVEST qoldaýymen Saýd Arabııasy Koroldiginiń ınvestıtsııalar mınıstri Halıd ál-Falıh QR Aýyl sharýashylyǵy mınıstri jáne QR Energetıka mınıstrimen, sondaı-aq «Qazatomprom» UAK» AQ, «KAZ Minerals» jáne basqa organdardyń basshylyǵymen kezdesti.
