Saýd Arabııasyndaǵy kepteliste mert bolǵandar sany 769 adamǵa jetti
ASTANA. QazAqparat - Saýd Arabııasyndaǵy qajylyq kezinde keptelis saldarynan qaza bolǵandardyń sany 769 adamǵa jetti. Bul týraly baspasóz máslıhatynda eldiń densaýlyq saqtaý mınıstri Haled ál-Faleh málim etti, dep habarlady TASS.
Onyń málimetteri boıynsha, taǵy 934 adam zardap shekken. Budan buryn 717 adam qaza bolyp, 865 adam zardap shekkeni habarlanǵan bolatyn.
Qaıǵyly oqıǵa 24 qyrkúıek kúni qajylar turatyn shatyrly lagerde Djamra kópirinen Mınadaǵy Mýzdalıfke musylmandardyń basty merekesi - Qurban aıtqa bara jatqan kezde oryn alǵan. Zııarat etýshilerdiń kóptep jınalýynan olar artynda kele jatqan adamdardyń aıaǵynyń astyna qulaǵan, al arttan syǵylysyp kele jatqan adamdar nópiri qozǵalysty toqtatýǵa múmkindik bermedi.
