Saýd Arabııasynda zeınettegi muǵalim Twitter jazbalary úshin ólim jazasyna kesildi
ASTANA. QazAqparat - Saýd Arabııasynda muǵalim Twitter jáne YouTube-te belsendi bolǵany úshin ólim jazasyna kesildi. Bul jaıynda Human Rights Watch adam quqyǵyn qorǵaý uıymyna silteme jasap DW habarlady.
Saýd Arabııasy 54 jastaǵy zeınetker ustaz Muhammed ál-Gamdıdi áleýmettik jelide jarııalaǵan jazbasy úshin ólim jazasyna kesti.
Sot ál-Gamdıdi bılikke qarsy sóz baılasty jáne memlekettik ınstıtýttarǵa nuqsan keltirdi dep aıyptady. Búkil kiná onyń Twitter jáne YouTube saıttarynda beıbit pikir bildirýine negizdelgen.
Onyń málimetinshe, sheshimdi Saýd Arabııasynyń qylmystyq ister jónindegi mamandandyrylǵan soty 10 shildede shyǵarǵan.
Sottalýshynyń kinásiniń dáleli retinde tvıtterin, retvıtterin, sondaı-aq YouTube jelisindegi belsendiligin kórsetken.
Sottyń pikirinshe, ál-Gamdı «korol men taq muragerin din men zańǵa nuqsan keltire otyryp sıpattady», «terrorıstik uıymmen baılanys jasady» jáne «terrorıstik qylmys jasaý maqsatynda jalǵan aqparat jarııalady» dep aıyptalǵan.
HRW kisini ózgeshe oılaǵany, elden ózgeshe pikiri úshin qýdalaý kúsheıgenin habarlady.
Human Rights Watch uıymy koroldikti «sóz bostandyǵyne qarsy qysymnyń kúsheıýin» kórsetetin sot úkimin buzýǵa shaqyrdy.
«Saýd Arabııasyndaǵy qýǵyn-súrgin jańa qorqynyshty kezeńge jetti, onda sot tek beıbit tvıtter úshin ólim jazasyn shyǵara alady», - dedi HRW Saýd Arabııasy boıynsha sarapshysy Djoı Shıh.
Ol el bıligin «bul ádildik parodııasynan bas tartýǵa» shaqyrdy.
Muhammed ál-Gamdı 2022 jyldyń maýsymynda Mekkedegi úıiniń janynda ustalyp, Djıddanyń soltústigindegi ál-Dahban túrmesine qamaldy. Onda tórt aı boıy jalǵyz kamerada otyrǵan.
Tipti advokatqa jáne týystarymen baılanysýyna ruqsat bermedi. Keıin ol Er-Rııadtaǵy ál-Haır túrmesine aýystyryldy.
Muhammad ál-Gamdı ózin saıası belsendi nemese quqyq qorǵaýshy sanamaıdy, tek Saýd Arabııasynyń úkimetine qandaı da bir alańdaýshylyǵyn bildirip júretin jeke tulǵa retinde sıpattaıdy, dep habarlaıdy HRW.
Sottalǵan kisi - Ulybrıtanııada qýǵynda júrgen belgili ıslamtanýshy Saıd bın Nasser ál-Gamdıdiń aǵasy.
Onyń aıtýynsha, bul úkim baýyryn elge qaıtarý úshin bılik tarapynan ádeıi jasalyp otyr.
Saýd Arabııasy bıligi sońǵy jyldary sheteldegi synaýshylar men dıssıdentter otbasyna qysym jasaý arqyly olardy elge oralýǵa májbúrleýge tyrysyp jatyr.
Ál-Gamdıdiń úkimi - áleýmettik jeli qoldanýshylaryna qarsy qozǵalǵan isterdiń ishindegi eń qatygezi.
Amnesty International quqyq qorǵaý uıymynyń málimetinshe, Saýd Arabııasy ólim jazasy jıi qoldanylatyn elderdiń biri.
