Saýd Arabııasynda zamanaýı arab kallıgrafııasy báıgesi bastaldy
ASTANA. 15 aqpan. QazAqparat - Saýd Arabııasynyń Mádenıet jáne BAQ mınıstrliginiń bastamasy boıynsha Mádına shaharynda «Zamanaýı arab kallıgrafııasynyń forýmy» dep atalatyn halyqaralyq konkýrs bastaldy. Jarys «Ál-Mádına ál-Mýnaýýara: kallıgraftardyń kózimen» degen taqyryppen ótedi. Bul jaıynda alarabiya.net aqparat portaly habar taratty.
muslim.kz saıtynyń jazýynsha, Mádına qalasynyń 2013 jyly ıslam mádenıetiniń ortalyǵy bolyp belgilenýine oraı Saýd Arabııasynda 2013 jylǵy maýsymǵa deıin jalǵasyn tabatyn arab kallıgrafııasynyń halyqaralyq báıgesi ótedi. Mádenıet mınıstriniń orynbasary - Nasyr ben ál-Hýdjeılıannyń sózine qaraǵanda, bul konkýrstyń basty maqsaty - arab kallıgrafııasyn álemge tanytý ári ejelgi ónerdiń tamyryna qan júgirtip, keńinen nasıhattaý.
«Báıgege qatysamyn dep arab jáne musylman elderinen kelgen sheteldik kallıgraftarǵa esigimiz ashyq. Sýretker óziniń konkýrstyq eńbeginde qalaýyna qaraı qarip túrin tańdap, paıdalana alady. Buǵan qosa, biz materıaldy tańdaýda jáne kórkemdik eńbektiń mazmunyna shekteý qoımaımyz. Báıgeniń basty sharty - kórermenniń kóńilinen shyǵý», - dedi mınıstrdiń orynbasary.
Onyń ústine, mınıstrdiń orynbasary barlyq konkýrstyq eńbektiń jaz mezgilinde ótetin Mádına shaharynyń tarıhyna qatysty kórmege qoıylatynyn qulaǵdar etti.
