Saýd Arabııasynda turatyn etnıkalyq qazaqtar Qazaqstanǵa oralýǵa nıet bildirgen

Búgin QR Parlamenti Májilisinde «Qazaqstannyń kóshi-qon zańnamasy: jetildirý joldary» taqyrybynda ótken dóńgelek ústel barysynda Eńbek jáne halyqty áleýmettik qorǵaý mınıstrligi Kóshi-qon komıtetiniń tóraǵasy Qabylsaıat Ábishev osylaı málim etti, dep habarlaıdy QazAqparat.

Jıyn barysynda depýattar tarapynan Qytaıdan, Ózbekstannan keletin etnıkalyq qandastarymyzdyń, onyń ishine jastardyń basqa álipbıde bilim alǵandyqtan ortaǵa sińisýi qıyn bolatyny týraly másele kóterilgen bolatyn.

Osyǵan oraı, saýalǵa jaýap bere kele Komıtet tóraǵasy Qabylsaıat Ábishev ásirese Qytaı elinen keletin oralmandar úshin birshama qıyndyqtar týatynyn da moıyndady. Onyń aıtýynsha, Qytaı, Iran, Aýǵanystannan keletin qandastarymyz basqa qaripterdi bilmeıdi, tek arab qarpimen ǵana bilim alǵandar.

«Jalpy bul másele boıynsha shyndyǵynda da problemalar barshylyq. Degenmen, olardy beıimdeý sharasyn jetildire túskenge kelisemin. Máselen, men óz bastamammen Óskemen, Taldyqorǵan qalalaryndaǵy beıimdeý ortalyqtaryna arab qarpimen mańdaıshadaǵy jazýlardy qatar jazyp qoıý máselesin kótergen bolatynmyn. Biraq, bul zańǵa qaıshy bolyp shyqty. Jalpy, beıimdeý ortalyqtarynda oralmandardy tegin oqytyp, ortaǵa kiriktirý sharalaryn júzege asyryp jatyrmyz», dedi Q. Ábishev.

Sonymen birge, Komıtet tóraǵasy jaqynda Saýd Arabııasynda turatyn etnıkalyq qazaqtardyń Qazaqstanǵa kelýge nıet bildirgenderin, olardy kóshirip ákelý jumystary da bastalǵanyn atap ótti. «Biz kútip otyrǵan bul qandastarymyz qazaqtyń tilin múldem bilmeıdi eken. Olar ózbekshe sóıleı alady, burynǵy Aýǵanystan qazaqtary kórinedi. Arabııanyń Jıdda, Mekke qalalarynda 25-30 jyldaı turyp kele jatyr eken, Qazaqstanyna oralýǵa nıet etipti. Bulardy da óz ortamyzǵa sińistirý mańyzdy mindetimiz bolmaq», dedi Q. Ábishev.