Saýd Arabııasynda nóser saldarynan 12 adam qaza tapty
ASTANA. QazAqparat - Saýd Arabııasynyń soltústigi men batysynda nóser saldarynan qaza tapqandardyń sany 12 adamǵa jetti. Bul týraly eldiń azamattyq qorǵanys qyzmeti búgin Twitter paraqshasynda málim etti, dep habarlaıdy «QazAqparat» HAA.
«Nóser saldarynan Medıne qalasynda jeti adam qaza tapty, sonyń biri koroldikte turaqty turatyn sheteldik. Al Djıddada úsh adam, Haıl aýdanynda eki adam mert boldy», - delingen habarlamada.
Saýd Arabııasynyń soltústigi men batysynda jeksenbide bastalǵan nóser tolastar emes. Jaýyn-shashyn aqyryndap el astanasyna jyljyp keledi. Sońǵy úsh kúnde atalǵan aýdandardaǵy bilim mekemelerinde sabaq bolǵan joq. Joldarda jańbyr sýy aǵyp ketetin aryqtar, qajetti ınfraqurylym bolmaǵandyqtan, sý basqan joldar kishigirim ózenge aınalyp jatyr.
