Saýd Arabııasynda memlekettik shekarada azamattardy tekserý kúsheıtildi
ASTANA. 2 qazan. QazAqparat - Saýd Arabııasynda koronavırýstyń tirkelýine ári qajylyq sapardyń bastalýyna oraı memlekettik shekarada azamattardy tekserý kúsheıtildi. Bul týraly búgin QR Densaýlyq saqtaý mınıstrligi Memlekettik sanıtarlyq-epıdemıologııalyq qadaǵalaý komıtetiniń basshysy Aıjan Esmaǵambetova málim etti.
Búgingi tańda dúnıejúzinde koronavırýstyq ınfektsııaǵa shaldyǵýdyń 140-tan astam oqıǵasy tirkelgenin atap ótken ol: «Onyń 130-y Saýd Arabııasyna tıesili. Aǵymdaǵy jylǵy qajylyq sapardyń qazannyń 13 men 18-i aralyǵyna sáıkes kelýin eskerip, biz memlekettik shekara arqyly ótkizý beketterindegi is-sharalardy kúsheıttik. Barlyq ótkizý beketterinde mindetti túrde baılanyssyz termometrııalyq tekserý júrgiziledi», - dedi.
Onyń sózine qaraǵanda termometrııalyq tekserý sharalary ótken jyly Qytaıda koronavırýs pen qus tumaýy tirkelgennen keıin qolǵa alynǵan. Sol ýaqyttan beri Taıaý Shyǵystan elimizge shamamen 40 myń, al Qytaıdan 100 myńnan astam adam kelgen. «Olardyń barlyǵy da baılanyssyz termometrııadan ótkizildi»,- dedi A.Esmaǵambetova.
