Saýd Arabııasynda qysqa beldemshe úshin ustalǵan boıjetken bosatyldy
ASTANA. QazAqparat - Saýd Arabııasynda qysqa beldemshe kıip, el azamattary men ınternet-paıdalanýshylardy shýlatqan boıjetken bostandyqqa jiberildi, dep habarlaıdy QazAqparat Associated Press agenttigine silteme jasap.
Eske salsaq, seısenbi kúni el polıtsııasy kóshede qysqa beldemshe kıip júrgeni úshin boıjetken qyzdy ustaǵan bolatyn. Málim bolǵandaı, ol birneshe saǵattan keıin, aıyp taǵylmastan bosatylǵan. Eldi shýlatqan vıdeo ınternetke onyń ruqsatynsyz ornalastyrylǵany anyqtaldy.
Qysqa beldemshe kıip aýyl kóshelerimen serýendep júrgen qyz týraly vıdeo áleýmettik jeliler arqyly dúısenbi kúni taraǵan bolatyn. Jeli qoldanýshylary ekige bólindi. Biri sharıǵat zańyn buzǵany úshin ony jaýapqa tartý kerek dese, ekinshileri boıjetkenniń batyldyǵyna qoldaý kórsetti.
Saýd Arabııasynda qyz-kelinshekterge ashyq-shashyq, tar kıim kııýge tyıym salynǵan. Sondaı-aq kólik júrgizýge, týysqandarynan basqa er adamdardyń ortasynda otyrýǵa ruqsat joq.
