Saýd Arabııasynda kúıeý jigit qalyńmaldy bir rıalmen ótegen
ASTANA. QazAqparat - Saýd Arabııasynda avtomobıl apatyna túsip, bolashaq jarymen nekelesýge apara jatqan bar dúnıesinen aırylyp qalǵan kúıeý jigit qalyńdyǵynyń qalyńmalyn nebári bir rıalmen ótegen, - dep habarlaıdy ITAR-TASS jergilikti BAQ taratqan aqparattarǵa súıenip.
Munaıly ólke Saýd Arabııasynda úılený úshin jumsalatyn shyǵyndardy - beriletin qalyńmal, altyn áshekeıler satyp alýdy ár jastyń qaltasy kótere bermeıdi. Al, osy eldiń bir turǵyny bolashaq jarymen nekege otyrý úshin bara jatqanynda jol-kólik oqıǵasyna tap bolǵan. Osy sátti ońtaıly paıdalanǵan qaskúnemder onyń qalyńmal retinde apara jatqan bar dúnıe-múlkin tonap ketken. Basynan ótkergen keleńsiz oqıǵadan eseńgirep qalǵan jigit súıgeniniń úıine jetken soń, nekelesý rásimin keıinge qaldyrýdy suraıdy. Alaıda, bolǵan jaıttan habardar bolǵan qaıyn atasy toıdyń shegerilýine qarsylyq bildirip, bolashaq kúıeý balasynan qalyńdyqtyń óteýi retinde nebári bir ǵana rıal suraǵan.
Oqıǵa eldegi jastardyń arasynda oń pikir týǵyzdy. «Qoǵamymyzda nekelesý rásimi kezinde oryn alatyn qarjylyq máselelerdi jeńildetý qajet. Bul jastardyń otbasyn qurýyn ońaılatady, sóıtip áleýmettik turaqtylyqty qamtamasyz etedi», - dep jazady saýdtyq blogger Abý Saýd bolǵan jaıtty ǵalamtorda talqylaý kezinde.
