Saýd Arabııasynda kózi kórmeıtin musylmandar úshin Quran basylyp shyǵýda
ASTANA. 8 shilde. QazAqparat - Saýd Arabııasynyń koroli Abdalla ıbn Ábdiáziz ál-Saýdtyń qaramaǵyndaǵy qasıetti eki meshittiń baspahanasy janary jasyq nemese kózi múldem kórmeıtin musylmandar úshin Braıl tásilimen Quran basyp shyǵardy. Bul jaıynda «Ýmma-ınform» aqparat agenttigi Iinanews basylymyna silteme jasaı otyryp, habar taratty.
Braıl tásili boıynsha Qurandy basyp shyǵarýǵa jaýapty Násir bın Áli ál-Musanyń sózine qaraǵanda, atalmysh baspahanadan shyqqan Qurandy tek saýdııalyq azamattar ǵana paıdalanyp qoımaı, sonymen birge, elden tysqary jerlerge de, mekemeler men kitaphalarǵa, t.b. tegin taratylady. muslim.kz saıtynyń jazýynsha, Braıl tásili boıynsha jaryq kórgen Qurandy ımamdar da, oqytýshylar da, stýdentter de paıdalana alady.
Saýdııalyq baspahana Braıl tásili boıynsha Qurandy basyp shyǵarýdy ary jalǵastyratyn bolady.
