Saýd Arabııasynda Qazaqstannyń sot tóreliginen jasyrynyp júrgender joq
Atap aıtqanda, Qazaqstan men Saýd Arabııasy Koroldigi arasyndaǵy kelisim 2016 jylǵy 25 qazanda Er-Rııadta jasaldy. Kelisimniń erejelerine sáıkes, taraptar ózderiniń aýmaǵyndaǵy ustap berýge ákep soǵatyn qylmystar úshin ekinshi taraptyń aýmaǵynda kúdik keltiriletin, aıyptalatyn nemese sottalǵan kez kelgen adamdy qylmystyq jaýaptylyqqa tartý men sot úkimin oryndaý maqsattarynda ustap berýge mindetteledi.
Zań jobasy boıynsha jasaǵan baıandamasynda QR Bas prokýrorynyń orynbasary Andreı Lýkın Qazaqstan postkeńestik keńistikte osyndaı kelisimdi Saýd Arabııasymen bekitken birinshi memleket ekenin atap ótti.
Qujatta qylmystyq qýdalaý turǵysynda ustap berý nemese odan bas tartýdyń negizdemeleri qarastyrylǵan. Osy rette eger de adamǵa áskerı nemese saıası sıpattaǵy qylmystar úshin suraý jasalsa, qylmystyq jaýapkershilikke tartýdyń merzimi ótip ketken jaǵdaıda, egemendik pen ulttyq qaýipsizdikke zalal keltirgen kezde, qoǵamdyq tártip pen basqa da múddelerge keri áser etse nemese Konstıtýtsııaǵa qaıshy bolsa ustap berý sharalary júzege asyrylmaıdy.
«Kelisim bekitilgen ýaqyttan bastap Saýd Arabııasymen yntymaqtastyq sharalary tıimdi iske asyrylyp keledi. Qazirgi kezde Qazaqstannyń sot tóreliginen Saýd Arabııasy aýmaǵynda jasyrynyp júrgen adamdar joq, sondaı-aq atalǵan eldiń Qazaqstan aýmaǵynda da izdestirip jatqan adamdar anyqtalmady. Kelisim aldyn alý sıpatyna ıe ekenin eskere otyryp, bul qujat bolashaqta eki eldiń qylmystylyqpen kúres salasyndaǵy tıimdi yntymaqtastyǵyna jaqsy quqyqtyq negiz jasaıdy», - dedi Lýkın.
Belgili bolǵandaı, búginde Qazaqstan alys shet memlekettermen ekijaqty 18 kelisimdi bekitti.
Sonymen qatar jalpy otyrysta pala depýtattary «Qazaqstan Respýblıkasy men Saýd Arabııasy Koroldigi arasyndaǵy sottalǵan adamdardy berý týraly kelisimdi ratıfıkatsııalaý týraly» zań jobasyn da qabyldandy.
