Saýd Arabııasynda birjynystylar ólim jazasyna kesiledi
ASTANA. 15 qazan. QazAqparat - Jýyrda Parlament Májilisiniń depýtaty Baqytbek Smaǵul birjynystylarǵa qarsy zań qabyldaý jóninde aıtyp qaldy. Bul másele jalpy, álem elderinde qalaı sheshiledi? degen oqyrman saýalyna «Alash aınasy» basylymy jaýap berdi.
Jalpy, álemde birjynystylardyń nekesin zańdastyratyn Ulybrıtanııa, Belgııa, Gollandııa, Islandııa, Norvegııa, Shvetsııa sekildi 15 memleket bar. Sondaı-aq gomoseksýaldy juptardy AQSh pen Meksıkanyń keıbir shtattarynda da resmı túrde tirkeıdi. Al birjynystylardyń juptasýyna Kýveıt pen Parsy shyǵanaǵyndaǵy arab memleketteri qarsy. Olar qazir osy elderge keletin sheteldik qyztekelerdi áýejaılarda-aq anyqtap, kelgen jaqtaryna qaıtarýǵa múmkindik beretin júıeni iske qospaqshy. Aldaǵy ýaqytta Kýveıt, Saýd Arabııasy, Oman jáne Birikken Arab Ámirlikteriniń bul bastamasy basqa elderden de qoldaý tabýy múmkin. Taǵy bir aıta keterligi, Kýveıtte bir jynystylardyń qarym-qatynas jasaýyna zań boıynsha tyıym salynǵan. Al áshkere bolǵandar abaqtaǵy jabylyp, aıyppul tóleıdi. Osyǵan uqsas zańdar Parsy shyǵanaǵy elderiniń kópshiliginde kezdesedi. Al Saýd Arabııasynda birjynystylardyń tósek qatynasyna barǵany dáleldense, ólim jazasyna kesiledi.
