Saýd Arabııasynda álemdegi eń iri áıelder ýnıversıteti ashyldy
ASTANA. 16 mamyr. QazAqparat - 15 mamyrda Saýd Arabııasynyń koroli Abdalla ıbn Abdel Azız, monarhııalyq otbasynyń ókilderi jáne úkimet músheleri hanshaıym Nora bın Abdel Rahmannyń álemdegi eń iri áıelder ýnıversıtetiniń saltanatty ashylý rásimine qatysty.
Bul ýnıversıtettiń ashylýy eldegi áıelderge arnalǵan joǵary bilimniń sapasyn arttyrýǵa baǵyttalǵan batyl qadam boldy, dep habarlaıdy VESTI.rý.
Koroldiktiń astanasy Er-Rııadtyń mańynda ornalasqan oqý ornynyń qurylysyna 5 mlrd. dollar jumsaldy. 50 myń stýdentti qabyldaı alatyn kampýstyń aýmaǵy 800 gektardy quraıdy.
Ýnıversıtet rektory Hoda ál-Amıl ýnıversıtet úsh jyldyń ishinde salynyp bitkenin aıtty. «Osy uıymnyń ashylýyna oraı biz korolge alǵysymyzdy bildiremiz, bul qyzmetkerler men stýdentterdi yntalandyrmaq», - dedi Hoda ál-Amıl.
