Saýd Arabııasyna qajylyq jasaıtyn barlyq qazaqstandyq musylmandarǵa «Qajylyq» jáne «Hadj - Palomnıchestvo» kitaptary syıǵa tartylady
ANA. 5 qarasha. QazAqparat - Osy kúnderi Qazaqstannyń júzdegen azamattary musylmannyń bes paryzynyń biri - qajylyqty oryndaý úshin Saýd Arabııasyna lek-legimen kelýde,
dep habarlaıdy Qazaqstannyń Saýd Arabııasyndaǵy Elshiliginiń baspasóz qyzmeti.
Qazaqstan qajylarynyń kóbisi arab tilin jetik bilmeýi saldarynan qasıetti Mekkedegi Allanyń Úıi bolyp sanalatyn Kaǵbany jeti ret aınalyp júrgende, Haram bas meshitindegi Safa men Marýa tóbeshikteri arasynda jeti ret jyldam júrgende, Arafat taýynda minajat etkende oqylatyn duǵalardy aıtýdan qınalyp jatady. Osy olqylyqtardy joıý maqsatynda jáne qajylardyń óz paryzdaryn durys oryndaýǵa járdem berý úshin Qazaqstannyń Saýd Arabııasyndaǵy Elshiligi Islam mádenıeti men bilimin qoldaý qorynyń demeýimen «Qajylyq» atty kitapty qazaq jáne orys tilderinde basyp shyǵardy.
Sonymen qatar bul anyqtama kitap arqyly Qazaqstan musylmandary Dinı basqarmasy men Saýd Arabııasy Koroldiginiń Qajylyq isteri jónindegi mınıstrligi arasyndaǵy Qajylyqty uıymdastyrý jáne ótkizý týraly kelisim shartpen tanysýǵa bolady. Onda Qazaqstan qajylarynyń Saýd Arabııasyna saparlaryn uıymdastyratyn týrıstik kompanııalarǵa júktelgen jaýapkershilikter men mindetter atap kórsetilgen.
Mekke men Medınedegi qasıetti jerlerdiń túrli-tústi sýretterimen bezendirilgen «Qajylyq» atty kitap kópshilik qaýymǵa arnalǵan. «Kókjıek» baspasynda 10 myń taralymmen jaryqqa shyqqan bul kitaptar qazaqstandyq qajylarǵa jáne elimizdegi eki myńnan astam meshitterge tegin taratylady.
