Saýd Arabııasy shól dalaǵa jańa qala salmaq
ASTANA. QazAqparat - Álemdegi eń iri munaı óndirýshi ári eksporttaýshy memleket Saýd Arabııasy tolyqtaı kún jáne jel energııasymen qamtamasyz etiletin Neom (Neom) megapolısi qurylysynyń josparyn usyndy. Shól dalada salynatyn qala Azııa jáne Afrıka elderi úshin tehnologııalyq hab bolatyny anyq. Bul jaıly TASS agenttigi habarlady.
Murager hanzada Mýhammed ben Salman ben Abdel Azız Al Saýd qurylys jobasyn «Bolashaqtyń ınvestıtsııalyq bastamalary» konferentsııasynda usyndy.
Jańa megapolıs mysyrlyq Sharm-esh-Sheıh shıpajaıyna jaqyn jerde, Qyzyl teńiz ben Akab shyǵanaǵy jaǵalaýynyń 25 myń sharshy kılometr aýmaǵynda ornalasatyn bolady. Jańa konglomeratsııa jaǵalaý boıymen shamamen 500 shaqyrymǵa sozylady, onyń úshten eki bóligin qumdy jaǵajaılar quraıtyn bolady.
«Saýd Arabııasynda áldebir uly dúnıe jasaýǵa bıliktiń saıası erkindigi men turǵyndardyń talap-tilegi bar. Bul bastamada jetistikke jetýge barlyq faktorlar da bar», - dedi «2030 kórinisi» ataýyna ıe bolǵan koroldiktegi ekonomıkalyq reformalardyń órshil baǵdarlamalarynyń avtory bolǵan 32 jastaǵy murager hanzada. Reformalar baǵdarlamasy búkil álemdegi ınvestorlardyń qyzyǵýshylyǵyn týdyrdy. Olar koroldik munaı kiristerin qandaı maqsatqa jumsaıtyndyǵyn estý úshin Er-Rııadtaǵy úshkúndik keńeske jınalǵan bolatyn.
