Saýd Arabııasy munaıdan bas tartpaq

ASTANA. QazAqparat - Saýd Arabııasynyń bıligi basty kiris kózi retindegi munaıdan jáne energııa resýrstarynan bas tartpaq nıette. Koroldik qaıtarymdy energııa kózderine basa kóńil bólýge umtylyp otyr. Bul týraly Saýd Arabııasynyń munaı mınıstri Álı ál-Naımı málim etti, dep habarlady Gazeta.ru Bloomberg agenttigine silteme jasap.

«Men qaıtarymdy energetıka úshin Saýd Arabııasynan artyq el tabylmas, dep oılaımyn», dep málim etti mınıstr.

Ál-Naımı koroldikte kún sáýlesi kóbirek túsetinin jáne koroldiktegi kóptegen aımaqtar paıdalanylmaı otyrǵanyn atap ótti.

Degenmen ál-Naımı taıaýdaǵy 50 jyl ishinde munaıdan tolyq bas tartatyn el shyǵa qoımas, degen kúdigin de jasyrmady.

«Taıaýdaǵy 50 jyl ishinde adamzat otynnan bas tartpaıdy, bul da jaman emes», - dep málimdedi ál Naımı.

Saýd Arabııasy budan buryn da óz ekonomıkasyn ártaraptandyrý, jáne munaı eksportyna táýeldilikten arylý jónindegi aýqymdy josparyn aıtqan bolatyn. 2016 jylǵy qańtardyń sońynda Saýd Arabııasy «munaıdan bas tartý» aýqymdy jobasyn usyndy.