Saýd Arabııasy munaı baǵasy barreline 60 dollar deńgeıinde turaqtalady dep kútýde
ASTANA. QazAqparat - OPEK-tiń iri eksportshysy munaı baǵasy barreline 60 dollar deńgeıinde turaqtalady dep kútýde. Parsy shyǵanaǵy bul jaǵdaıdyń kópke sozylmaıtynyna senimdi, sonymen birge taıaý ýaqytta munaı óndirý kólemin azaıtpaq emes, dep habarlady RBK.
OPEK munaı baǵasynyń qarqyndy quldyraǵan jaǵdaıyna beıimdelýge májbúr. Іri munaı óndirýshi Saýd Arabııasy men Parsy shyǵanaǵynyń basqa da elderi munaı baǵasy barreline 60 dollar kóleminde turaqtalady dep kútýde, dep jazady The Wall Street Journal.
Jaǵdaıdy jaqsy biletin munaı eksportshylary mundaı baǵamen jaǵdaıdy eńserýge bolady dep sanaıdy. Tipti barreline 60 dollardan tómen túsken jaǵdaıda da bul uzaqqa sozylmaıtyn úrdis», - dep basylym munaı sheneýniginiń pikirin keltirgen.
Qarashanyń basynda OPEK elderiniń ókilderi barreline 70 dollarǵa tússe de munaı eksportshylary dúrlikpeıtinin aıtqan. 3 jeltoqsan kúni, sársenbide Brent markaly munaı barreline 70 dollardan sál asatyn deńgeıde satyldy.
Іri arab memleketiniń ókilderi qazanda munaı naryǵynyń qatysýshylarymen, taldaýshylarymen kezdesý barysynda eldiń taıaý jyldary munaı baǵasynyń barreline 80 dollarǵa deıin túsýine ázir ekendigin málimdegen. Orta merzimdi perspektıvada OPEK-tegi iri munaı óndirýshi neǵurlym joǵary tabysqa úmittengen: saýdtyqtar munaıdyń tómen baǵasy básekeles jobalardan usynys ósimin toqtatady dep kútken.
