Saýd Arabııasy men Iran arasyndaǵy shıelenis saldarynan munaıdyń baǵasy ósti
ASTANA. QazAqparat - Saýd Arabııasy men Irannyń qaqtyǵysy saldarynan kesheden beri álemdik munaıdyń baǵasy ósip jatyr, dep jazady Bloomberg basylymy. Jeksenbi kúni keshke Er-Rııad Tegeranmen dıplomatııalyq qarym-qatynastyń úzilgeni týraly jarııa etti, bul Irandaǵy Saýd Arabııasy elshiligindegi tártipsizdikterden keıin oryn alyp otyr, dep habarlaıdy reseılik RBK agenttigi.
ICE London bırjasynda saýdalanýy barysynda Brent munaıynyń aqpandyq fıýchersi kúrt ósti, 3 jeltoqsanda onyń joǵary baǵamy - barreline 38,50 dollarǵa jetti. Budan sál ýaqyttan keıin baǵa ósip, keıinnen barreline 37,89 dollarǵa qaıta tústi. Alaıda keıin fıýcherster qaıta ósip 38 dollardan asyp ketti. Búgin tańerteń barreline 38,18 dollar bolyp, saýda jabylǵan kezde baǵa 1,53 paıyzǵa artty.
Nıý-Iork taýar bırjasynda WTI munaıy 3,5%-ǵa artyp, barreline 38,38 dollar deńgeıinde tur.
«Naryq Saýd Arabııasy men Iran sekildi munaı óndirýshi memleketter arasyndaǵy qazirgi oqıǵalardy, uzaqqa sozylatyn shıelenistiń bastapqy qadamy dep qabyldaıdy», - deıdi Sıdneıdegi CMC Markets bas sarapshysy Rıka Spýnera.
«Saýd Arabııasy men Iran arasyndaǵy shıelenisti esepke alsaq, geosaıası jaǵdaıǵa qatysty qaýip ulǵaıyp keledi», - deıdi Dýbaıdaǵy Manaar Energy Consulting taldaýshysy Robın Mılls.
Bloomberg keltirgen málimetterge kóz júgirtsek, Saýd Arabııasy men Iran OPEK (Munaı eksporttaýshy elderdiń uıymy) quramyna kiretin memleketter arasynda munaı óndirý kólemi boıynsha birinshi jáne besinshi orynda.
Esterińizge sala ketsek, 3 qańtarda Saýd Arabııasynyń syrtqy ister mınıstri Adel ál-Djýbeır koroldik Iranmen dıplomatııalyq qarym-qatynasty úzetini jaıly málim etti. Tegerannyń dıpmıssııasy koroldik aýmaǵynan 48 saǵat ishinde ketýi tıis. Qarym-qatynastyń úzilýine Saýd Arabııasynyń 47 adamdy ólim jazasyna kesip, olardy óltirgennen keıin Irandaǵy SA dıplomatııalyq ókildigindegi buqaralyq tártipsizdik sebep boldy.
2 qańtarda Saýd Arabııasy ІІM lańkestikke qatysy bar dep aıyptalǵan 47 adamdy ólim jazasyna kesti. Olardyń ishinde saýd bıligine qatysty ótkir syn aıtqan shııt ýaǵyzshysy Nımr an-Nımr bar. Bul jańalyq shııtter kóp elderde jáne Iranda narazylyq týdyrdy.
