Saýd Arabııasy men BAÁ Iemenge 1 mlrd dollar kóleminde kómek beredi
ASTANA.QazAqparat - Saýd Arabııasy men Birikken Arab Ámirlikteri Iemen halqyna ýáde etken 1 mlrd dollar qarjyny BUU-ǵa aýdaratyn boldy.
Gýmanıtarlyq kómek Iemendegi porttar men ınfraqurylymdardy qalpyna keltirý jumystaryna jumsalmaq. Bul týraly dúısenbi kúni BUU Bas hatshysynyń orynbasary Mark Loýkak málimdedi, dep habarlaıdy TASS.
«Saýd Arabııasy men BAÁ búgin (dúısenbi kúni) BUU-men 31 naýryzǵa qaraı 930 mln dollar qarjy aýdarýǵa kelisti. Atalǵan kómek 2018 jyly Iemendegi gýmanıtarlyq is-qımyl josparlaryn júzege asyrýǵa jaratylady»,-delingen Lýkoktyń jazbasha málimdemesinde.
Onyń aıtýynsha, Iemenniń ınfraqurylymyna arnalǵan qosymsha 70 mln dollardy da eki el birigip usynbaq.
