Saýd Arabııasy Koroldigine jer berýge qatysty qujat Senattyń jalpy otyrysynda qaralatyn boldy
ANA. 27 jeltoqsan. QazAqparat /Aıdar Ospanalıev/ - Búgin Parlament Senatynyń Halyqaralyq ister, qorǵanys jáne qaýipsizdik komıtetiniń keńeıtilgen otyrysynda «Qazaqstan Respýblıkasynyń Úkimeti men Saýd Arabııasy Koroldiginiń Úkimeti arasyndaǵy Astana qalasynda Saýd Arabııasy Koroldigi elshiliginiń obektilerin salý úshin jer ýchaskesin berý týraly kelisimdi ratıfıkatsııalaý týraly» zań jobasy talqylandy.
Otyrys barysynda atalmysh qujatqa baılanysty baıandama jasaǵan Syrtqy ister mınıstrliginiń Jaýapty hatshysy Rápil Joshybaevtyń aıtýynsha, Qazaqstan Respýblıkasynyń Úkimeti men Saýd Arabııasy Koroldigi Úkimetiniń arasyndaǵy Astana qalasynda Saýd Arabııasy Koroldiginiń elshiliginiń nysandaryn salý úshin jer telimderin berý týraly kelisimge 2009 jylǵy 4 aqpanda Astanada qol qoıylǵan. Oǵan sáıkes, Qazaqstan tarapy Saýd Arabııasyna elordadaǵy Qarasaz kóshesindegi aýdany 1,8 gektar jer telimin 49 jylǵa ýaqytsha óteýsiz beredi. Óz kezeginde Saýd Arabııasy Koroldigi de tap osyndaı sharttarmen Qazaqstanǵa Er-Rııad qalasyndaǵy dıplomatııalyq kvartaldan 1,2 gektar jer telimin beredi. «Saýd Arabııasy elimizdiń 2011 jyly Islam konferentsııasy uıymyna múshe elderdiń Syrtqy ister mınıstrleri keńesine tóraǵalyǵymyz barysyndaǵy barlyq bastamalarymyzǵa qoldaý kórsetedi. Sonymen qatar talqyǵa usynylyp otyrǵan qujat eki el arasyndaǵy qarym-qatynastardyń odan ári ilgerileýine ózindik yqpal etedi», - dedi Jaýapty hatshy.
Osyǵan qaraı otyrysta zań jobasyn jan-jaqty talqylaǵan senatorlar qujatty Senattyń jalpy otyrysynyń kún tártibine engizý qajet dep sheshti.
