Saýd Arabııasy – Qazaqstannyń Taıaý Shyǵystaǵy mańyzdy seriktesi Álıhan Smaıylov
NUR-SULTAN. QazAqparat - QR Premer-Mınıstri Álıhan Smaıylov Saýd Arabııasy Koroldiginiń syrtqy ister mınıstri Feısal ben Farhan Ál Saýdpen kezdesti, dep habarlaıdy QazAqparat vedomstvonyń resmı saıtyna silteme jasap.
QR Premer-Mınıstri búginde eki el arasynda joǵary deńgeıde senimdi saıası dıalog ornaǵanyn, mádenı-gýmanıtarlyq baılanystar nyǵaıyp, saýda-ekonomıkalyq jáne ınvestıtsııalyq yntymaqtastyq damyp kele jatqanyn atap ótti.
«Saýd Arabııasy – Qazaqstannyń Taıaý Shyǵystaǵy mańyzdy seriktesi. Biz ózara taýar aınalymynda oń dınamıkany baıqap otyrmyz, alaıda onyń qazirgi kólemi áli de bizdiń áleýetimizge sáıkes kelmeıdi. Osyǵan baılanysty elderimizdiń isker toptary arasynda tyǵyz baılanys ornatý mańyzdy dep sanaımyz», - dedi Álıhan Smaıylov.
Premer-Mınıstr Qazaqstan resmı tulǵalarmen jáne kásipkerlermen kelissózder júrgizý úshin koroldikke saýda mıssııasyn jiberýdi josparlap otyrǵanyn atap ótti.
Óz kezeginde Feısal ben Farhan Ál Saýd Saýd Arabııasy ózara tıimdi ekonomıkalyq yntymaqtastyqty damytý úshin barlyq múmkindikterdi paıdalanýǵa daıyn ekenin jetkizdi. Osyǵan baılanysty eki el kásipkerleriniń iskerlik baılanystary úshin qolaıly jaǵdaı jasaý qajet ekeni atap ótildi.
«Bizde yntymaqtastyq ornatýǵa baǵyttar jeterlik. Eki el basshylary ózara qarym-qatynastardy nyǵaıtý jóninde tıisti tapsyrmalar berdi. Osyǵan baılanysty biz ózara qyzyǵýshylyq týdyratyn barlyq salada jumysty jandandyrýǵa daıynbyz», - dedi syrtqy saıasat vedomstvosynyń basshysy.
