Saýd Arabııasy Iranmen dıplomatııalyq qarym-qatynasty qalpyna keltirý úshin óziniń talaptaryn bildirdi
ASTANA. QazAqparat - Tegeran koroldiktiń jáne óńirdiń ózge elderiniń ishki isterine aralasýyn toqtatsa, Saýd Arabııasy Iranmen dıplomatııalyq qatynasty qalypqa keltiredi. Mundaı talapty dúısenbi kúni BUU janyndaǵy koroldiktiń turaqty ókili Abdalla Ál-Mýallımı jarııa etti, dep habarlady TASS.
"Iran ózge elderdiń, onyń ishinde Saýd Arabııasynyń ishki isterine aralasýdy toqtatýy tıis. Eger Iran osyndaı áreketke barsa, onda bul elmen qarym-qatynasymyz jaqsarady", - dedi dıplomat jýrnalısterge. Ol dıplomatııalyq baılanystyń úzilýi Tegerannyń baǵyty ózgerýine áser etedi dep úmittenip otyrǵanyn bildirdi.
Er-Rııad 3 qańtarda Iranmen dıplomatııalyq baılanystyń úzilgenin jarııalady. Buǵan koroldik aýmaǵynda ólim jazasyna kesilgen shıit ýaǵyzshysy Nımra an-Nımrdiń qaza bolýyna narazylyq bildirgenderdiń Saýd Arabııasynyń Tegerandaǵy elshiligi men Meshhedtegi konsýldyǵyna shabýyl jasaýy sebep boldy. Dúısenbi kúni Bahreın men Sýdan Iranmen dıplomatııalyq qarym-qatynasty úzetinin jarııalady, al Birikken Arab Ámirlikteri IIR-men dıplomatııalyq qarym-qatynasty senimdi ókil dárejesine deıin tómendetti.
Saýd turaqty ókili BUU Qaýipsizdik Keńesi jaqyn arada elshilik pen konsýldyqqa «sebepsiz» shabýyl jasaldy degen málimdemeni qabyldap, Iran úkimetin Vena konventsııasyna sáıkes dıplomatııalyq mıssııalardy qorǵaýdy qamtamasyz etýge shaqyrady degen senimin bildirdi.
