Saýd Arabııasy eńbekaqy teńsizdiginen aryla bastady
ASTANA. QazAqparat - Saýd Arabııasy koroldiginiń murager hanzadasy Muhammed ben Salman AQSh-qa jasaǵan saparynda CBS arnasynyń 60 minutes baǵdarlamasyna suhbat berdi.
Suhbat kezinde taq murageri kóptegen suraqtarǵa jaýap berdi.
Muhammed ben Salman «Saýd Arabııasynda áıelder men erler teń be?» degen suraqqa «shúbásiz» degen jaýap qaıtardy. «Barlyǵymyz - adambyz, bizdiń aramyzda eshqandaı aıyrmashylyq joq», - dedi ol.
Saýd Arabııasynyń bolashaq basshysy eldiń ózgeshe bastama jasap jatqanyn aıtyp ótti.
«Biz erler men áıelder úshin teń eńbekaqyǵa kepildik beretin ereje jasaýǵa baǵyttalǵan bastama ázirlep jatyrmyz», - dep málim etti ol CBS arnasyna bergen suhbatynda.
Taq murageri Saýd Arabııasynda áıelderdiń tek 22%-ynyń jumys isteıtinin jáne bul kórsetkishtiń óskenin qalaıtynyn málim etti.
