Saýd Arabııasy ben Laden otbasy músheleriniń Anglııada bolǵan áýe apatynda qaza tapqanyn rastady
ASTANA. QazAqparat - Saýd Arabııasy 31 shilde kúni Anglııanyń Gempshır graftyǵynyń Blackbushe áýejaıynyń janynda qulaǵan shaǵyn ushaqtyń apaty saldarynan burynǵy «nómir birinshi lańkes» Ýsama ben Ladenniń otbasy músheleri qaza tapqanyn rastady, dep habarlady TASS.
Brıtandyq Bı-Bı-Sı teleradıohabar taratý korporatsııasynyń aqparatynsha, bul týraly Saýd Arabııasynyń Ulybrıtanııadaǵy Elshisi, hanzada Muhammed ben Navaf ál-Saýd habarlaǵan.
«Joǵary mártebeli Muhammed ben Navaf ál-Saýd Muhammed ben Ladenniń otbasy men jaqyndaryna olardyń otbasy múshelerin tasymaldaǵan áýe kemesiniń apaty saldarynan bolǵan qaıǵysyna ortaqtasyp, kóńil aıtty», - delingen Elshiliktiń Twitter áleýmettik jelisindegi paraqshasynda.
Mılanǵa attanǵan Embraer Phenom 300 ushaǵy ushqan soń birden avtomobılderdi satý boıynsha bássaýda kompanııasynyń aýmaǵynda qulaǵan. Qatty bıiktikke kóterilmeı, qısaıa bastaǵan, odan keıin ushqysh áýe kemesin qondyrýǵa áreket jasady, biraq odan eshteńe shyqpady. Ushaq turaqqa qoıylǵan kólikterdiń ústine qulady. Ushqysh pen úsh jolaýshy qaza tapty.
Buǵan deıin Londonnyń Daily Mail gazeti quny 7 mln. fýnt sterlıng (shamamen 11 mln. dollar) bolǵan ushaq Saýd Arabııasynan shyqqan lańkestiń otbasy qadaǵalaǵan Salem Aviation kompanııasynyń ıeliginde bolǵanyn habarlady.
